Tags-Charagh

gum-shuda sūraj ko rotā hai mirā yaum-e-saped
surma.ī shab ko charāġh-e-āñ-jahānī chāhiye

charāġh-e-zīst bujhā dil se ik dhuāñ niklā
lagā ke aag mire ghar se mehmāñ niklā

ruke raheñge fasīl-e-zulmat ke dā.ere par sabhī musāfir
magar kisī ḳhvāb ke jilau meñ charāġh niklegā kārvāñ se

nūr-e-charāġh tāq-e-taġhāful dil tārīk na kar
bol kuchh ai māh-e-yaktā.ī ham majbūroñ se

merī āñkhoñ meñ un kā jalva hai
aa.ine meñ charāġh jaltā hai

dil jalāte ho sard-mehrī se
is tarah bhī charāġh jaltā hai

hijr meñ dil kā daaġh jaltā hai
be-kasī kā charāġh jaltā hai

shola-e-āh ye nahīñ hai 'safīr'
hasratoñ kā charāġh jaltā hai

dam hai āñkhoñ meñ nabzeñ Duubī haiñ
dhīmā dhīmā charāġh jaltā hai

mujh ko kyā ġham jo haiñ tārīk adam ke raste
dāġh-e-dil hoñge charāġh-e-rah-e-manzil mujh ko

maiñ jāntā huuñ añdheroñ kī zindagī kyā hai
bujhe charāġh to dil kā diyā jalā.ūñ maiñ

miT jaa.e jis ke nuur se zulmat hayāt kī
aisā koī charāġh-e-munavvar talāsh kar

tah-ba-tah añdheroñ tak raushnī to phailegī
ek raat kī zid meñ sau charāġh chalte haiñ

na.ī havāoñ se laḌne ke vāste 'azbar'
hameñ charāġh na.e taur ke banāne paḌe

kahīñ thī raushnī matlūb aur kahīñ raunaq
kahīñ charāġh kahīñ qumqume banāne paḌe

kuchh ghar aise haiñ jahāñ jalte nahīñ shab ko charāġh
ġhaur farmāte nahīñ us par magar ahl-e-dimāġh

us ne sūraj ke muqābil rakh diye apne charāġh
vo ye samjhā is tarah kuchh raushnī baḌh jā.egī

mere dāġh-e-dil se hai raushnī isī raushnī se hai zindagī
mujhe Dar hai ai mire chāra-gar ye charāġh tū hī bujhā na de

ek hameñ hī ai sahar niiñd na aa.ī raat bhar
zānū-e-shab pe rakh ke sar saare charāġh so ga.e

nafas nafas meñ bhaḌaktī hai dil kī lau 'sarmad'
ajab charāġh hai ye bām-e-hū pe Thahrā hai