Tags-Charagh

dāmān-e-ḳhirad ne ye havā dī
jitne the charāġh sab bujhā.e

karb kī masmūm lahreñ tez tar hone lagīñ
rakh diyā kis ne charāġh-e-dil havā ke sāmne

jis kī ḳhātir charāġh bantā huuñ
ghūrtā hai vahī havā kī tarah

charāġh-e-rāh bujhā kyā ki rahnumā bhī gayā
havā ke saath musāfir kā naqsh-e-pā bhī gayā

bhalā mujh pe Dhā.eñ to Dhā.eñ kyā sitam ab zamāne kī āñdhiyāñ
maiñ bujhā huā sā charāġh huuñ maiñ miTā huā sā ġhubār huuñ

parvāna-vār go ki jalāyā hai ishq ne
lekin charāġh-e-gor-e-ġharībāñ se duur huuñ

bulāvā kaun sā koh-e-nidā meñ rakkhā hai
charāġh ham ne jo apnā havā meñ rakkhā hai

ravish pe jaleñ us kī āhaToñ se charāġh
ajab ḳhirām hai āvāz-e-pā dikhā.ī de

sad hāsil-e-tarab hai rifāqat kī ye ghaḌī
vo mujh ko dekhte haiñ charāġh-e-sahar ko maiñ

sab kī dahlīzoñ pe jalte haiñ ta.assub ke charāġh
kyā karegā koī aise meñ hifāzat ghar kī

hai sar-e-shab aur mire ghar meñ nahīñ koī charāġh
aag to is ghar meñ jānāna lagāte jā.iye

baqā hamārī jo pūchho to juuñ charāġh-e-mazār
havā ke biich koī dam rahe rahe na rahe

ḳhas se jaise charāġh jaltā hai
daaġh ke kaam jism-e-zār aayā

bujhte hue charāġh kī sūrat havā huuñ maiñ
ik ḳhūb-rū vajūd kī tāqat tamām-shud

na koī zaḳhm lagā hai na koī daaġh paḌā hai
ye ghar bahār kī rātoñ meñ be-charāġh paḌā hai

ḳhizāñ ke chāñd ne pūchhā ye jhuk ke khiḌkī meñ
kabhī charāġh bhī jaltā hai is havelī meñ

āñdhiyo aa jaao khul kar maiñ charāġh-e-tūr huuñ
mujh se Takrāne kā tum ko bhī maza mil jā.egā

vo aañkh bujh ga.ī jis se charāġh jalte the
tamām tiira gharoñ meñ koī ḳhabar de de

visāl-e-yār ki jis meñ charāġh jalte hoñ
mire nasīb ko aisā hī ik nagar de de

apnī āñkheñ nahīñ jalā.ūñgī
maiñ ne bujhte charāġh dekhe haiñ