Tags-Charagh

duniyā se dāġh-e-zulf-e-siyah-fām le gayā
maiñ gor meñ charāġh sar-e-shām le gayā

añdherā hī añdherā har taraf hai
charāġh-e-dil kahāñ tak ham jalā.eñ

kahīñ bhī aag lage us kā naam aatā hai
use charāġh jalāne kī ādateñ thiiñ bahut

sham.a har shaam tere rone par
sub.h-dam tak charāġh hañstā hai

jis tarah kaale ke man ke rū-ba-rū gul ho charāġh
dekh kar ta.avīz-e-zulf-e-yār bujh jaatī hai sham.a

charāġh-e-dār kī lau maañd paḌ rahī hai 'nadīm'
phir apne naam kā elaan hone vaalā hai

isī liye to jalātā huuñ āñdhiyoñ meñ charāġh
yaqīn hai ki nigahbān hone vaalā hai

charāġh-e-zīst maddham hai abhī tū nam na kar āñkheñ
abhī ummīd meñ dam hai abhī tū nam na kar āñkheñ

is kā nahīñ hai ġham koī jaañ se agar guzar ga.e
dikh kī añdherī qabar par ham bhī charāġh dhar ga.e

jis se saare charāġh jalte the
vo charāġh aaj kuchh bujhā sā thā

yaaro na charāġh aur na maiñ sham.a huuñ lekin
har shaam ko jaltā huuñ jalā.e se kasū kī

shukriyā tum ne bujhāyā mirī hastī kā charāġh
tum sazā-vār nahīñ tum ne to achchhā.ī kī

kahāniyāñ thī vo rāteñ kahāniyāñ the vo log
charāġh gul karo aur bujh-bujhā ke so jaao

charāġh qatl huā to ḳhushī se maqtal meñ
lagā ke nāra-e-raqsam havā ne raqs kiyā

ishq ke daaġh hue mahv is āshob meñ sab
TimTimātā sā charāġh-e-ruḳh-e-zebā dekhā

kis kī tanvīr se jal uTThe basīrat ke charāġh
kis kī tasvīr ye āñkhoñ se lagā.ī ga.ī hai

charāġh-e-hasrat-o-armāñ jalāo.ge kaise
havā-e-dahr to rah rah ke phūñk mārtī hai

gul-e-havas bhī hai shāḳh-e-visāl kā hissa
charāġh-e-lāla kī taaza kalī meñ dekh mujhe

kisī meñ himmat na thī ki baḌh kar junūñ kī zanjīr thaam letā
ḳhirad kī bastī meñ hai añdherā charāġh sahrā meñ jal rahā hai

ujāle tel chhiḌakne lage ujāloñ par
ajiib vaqt paḌā hai charāġh vāloñ par