Tags-Charagh

dekhegā aaj merī taraf kaun pyaar se
bujhtā huā charāġh huuñ patjhaḌ kā chāñd huuñ

maiñ jalātā rahā tere liye lamhoñ ke charāġh
tū guzartā huā sadiyoñ kī savārī meñ milā

aage qadam baḌhā.eñ jinheñ sūjhtā nahīñ
raushan charāġh-e-rāh kiye jā rahā huuñ maiñ

vasl-e-mahvash kā dilā muzhda hameñ de hai charāġh
jhaḌte haiñ har dam shab-e-hijrāñ meñ muñh se is ke phuul

kachchī muñDeroñ vaale ghar meñ shaam ke Dhalte hī har roz
apne dupaTTe ke pallū se koī charāġh jalātā hai

dil meñ jab ehsās kā sho.ala farozāñ ho gayā
nuur afshāñ har charāġh-e-bazm-e-imkāñ ho gayā

charāġh-e-zindagī hai yā bisāt-e-ātish-e-rafta
jalā kar raushnī dahlīz-e-jāñ par sochte rahnā

zarā sī der meñ vo jaane kyā se kyā kar de
kise charāġh banā de kise havā kar de

ye daur vo hai ki baiThe raho charāġh-tale
sabhī ko bazm meñ dekho magar dikhā.ī na do

ab tak to kamī kuchh na huī dāġh-e-jigar meñ
barsoñ se charāġh ek hī jaltā rahā ghar meñ

'farāz' zulm hai itnī ḳhud-e'timādī bhī
ki raat bhī thī añdherī charāġh bhī na liyā

tū apnī zaat meñ ik manzil-e-vafā hai magar
maiñ vo charāġh ki raushan hai rāstā mujh se

tirī nazar se diloñ ke charāġh jal uTThe
inhīñ charāġhoñ se duniyā ne raushnī paa.ī

kabhī jo jalva-e-ruḳhsār-e-yār hotā hai
charāġh-e-tūr charāġh-e-mazār hotā hai

muāni-e-shab-e-tārīk khul rahe the 'salīm'
jahāñ charāġh nahīñ thā vahāñ ujālā thā

ḳhud apnī lau meñ thā mehrāb-e-jāñ meñ jaltā thā
vo musht-e-ḳhāk thā lekin charāġh jaisā thā

ye sukūn-e-jāñ kī ghaḌī Dhale to charāġh-e-dil hī na bujh chale
vo balā se ho ġham-e-ishq yā ġham-e-rozgār koī to ho

hai buuñd araq kī zulf ke biich
yā gauhar-e-shab charāġh hai ye

merī raat kā charāġh
merī niiñd bhī hai tū

bhalā kahāñ kise mumkin hai ye adā har baar
charāġh rakhtā hai lau par dam-e-havā har baar