Tags-Charagh

kaaTī hai umr raat kī pahnā.iyoñ ke saath
ham shahr-e-be-charāġh meñ ai be-kasāñ rahe

maiñ apne ḳhuuñ se jalā.ūñgā rahguzar ke charāġh
ye kahkashāñ ye sitāre mujhe qubūl nahīñ

kahāñ bhaTaktī phiregī añdherī galiyoñ meñ
ham ik charāġh sar-e-kūcha-e-havā rakh aa.e

tirī zindagī bhī charāġh thī terī garm-e-ġham bhī charāġh hai
kabhī ye charāġh jalā diyā kabhī vo charāġh jalā diyā

shaam hī se jal uThe jab us kī yādoñ ke charāġh
chhāñv meñ tāroñ kī shab par bhī nikhār aane lagā

kyuuñ kisī shab charāġh kī ḳhātir
apnī nīndeñ harām karne lagā

maiñ sāmne se uThā aur lau larazne lagī
charāġh jaise koī baat karne vaalā thā

tamām umr mirā dil usī dhueñ meñ ghuTā
vo ik charāġh thā maiñ ne use bujhāyā hai

dekhiye añdheroñ ke jism kab pighalte haiñ
tīrgī ziyāda hai aur charāġh-e-shab tanhā

tā-sub.h hai ba-manzil-e-maqsad rasīdanī
dūd-e-charāġh-e-ḳhāna ġhubār-e-safar hai aaj

huuñ dāġh-e-nīm-rañgī-e-shām-e-visāl-e-yār
nūr-e-charāġh-e-bazm se josh-e-sahar hai aaj

vo ik charāġh hai dīvār-e-ḳhastagī pe rukā
havā ho tez to har haal meñ ziyāñ us kā

bujhī jaatī haiñ sham.eñ rahguzār-e-zindagānī kī
charāġh-e-ārzū lekin kabhī maddham nahīñ hotā

tumhārī fikr kī kotāh-qad havelī meñ
bujhe charāġh to phir makḌiyoñ ke jaale hue

amīr-e-shahr ke āñgan meñ jab ujāle hue
na jaane kitne gharoñ ke charāġh kaale hue

tū merī shaam kī palkoñ se raushnī mat chhīn
jahāñ charāġh jalā.e vahāñ dhuāñ mat kar

pichhlā pahar hai shab kā savere kī ḳhair ho
bujhte hue charāġh haiñ jalnā nahīñ hai ab

ek baaqī charāġh thā achchhā
us ko tum ne bujhā diyā hogā

maiñ charāġh se jalā charāġh huuñ
raushnī hai pesha ḳhāndān kā

ik harf-e-fasurda daaġh meñ hai
ik baat bujhe charāġh meñ hai