Tags-Charagh

mah o sitāra to aa.ine ke vajūd se munharif hue haiñ
magar tirī chashm-e-mehrbāñ ko charāġh se guftugū vahī hai

agarche zor havāoñ ne Daal rakkhā hai
magar charāġh ne lau ko sambhāl rakkhā hai

bujhtā huā charāġh ye fariyād kar gayā
nafrat havā se aur charāġhoñ se pyaar kar

sitāre hairān ho rahe the
charāġh miTTī meñ jal rahā thā

charāġh-e-shām hī tanhā nahīñ hai
havā maiñ ne bhī ghar dekhā nahīñ hai

uThā shor mahfil-e-nāz se huiiñ ābdīda masarrateñ
liyā kis ne naam 'sirāj' kā ki charāġh ashk ke jal ga.e

mile sard-āhoñ meñ ashk-e-ġham to sharār-o-barq meñ Dhal ga.e
ye na jaane kaise charāġh the ki havā ke ruḳh pe bhī jal ga.e

mire āsmāñ ke liye na thā koī phuul ātish-e-sub.h kā
so mire lahū ke charāġh ne ka.ī sard rātoñ se jañg kī

charāġh-e-ishq badan se lagā thā kuchh aisā
maiñ bujh ke rah gayā us ko havā banāne meñ

laraz ga.ī tirī lau mere Dagmagāne se
charāġh-e-gosha-e-kū-e-habīb kyā kahnā

maiñ ne charāġh-e-ishq jalā.e the jo 'nadīm'
hamrāh mere chhoḌ ke sab taaq chal paḌe

har laala us chaman kā hai be-dāġh aarzū
shabnam se ye charāġh jalāyā na jā.egā

charāġh ne phuul ko janm denā shurūa kar diyā hai
duur bahut duur merā janm din rahtā hai

dekhā to ek sho.ale se ai shaiḳh-o-barhaman
raushan haiñ sham-e-dair o charāġh-e-haram baham

agar charāġh bhī āñdhī se Dar ga.e hote
to sochiye ki ujāle kidhar ga.e hote

is tilism-e-asr-e-hāzir se jab āñkheñ jal uThīñ
duur jaltā ik charāġh-e-ism-e-āzam dekhnā

chahār samt se gherā hai tez āñdhī ne
kisī charāġh kī lau phir bhī jaltī jaatī hai

ātish-e-'farhat'-o-'asmā' ne jalā.e do charāġh
ek bīnish se jalā ek jalā yūshī se

kuchh ehtimām na thā shām-e-ġham manāne ko
havā ko bhej diyā hai charāġh laane ko

hai maut kā rañg mirā jīvnā jiyūñ dhundlā charāġh huuñ maiñ
sakrāt kī zulmat ek taraf hastī kī tohmat ek taraf