Tags-Charagh

so bhī vo tū na dekh sakī ai havā-e-dahr
siine meñ ik charāġh rakhā thā jalā huā

shiddat se haañp haañp ke murda sī ho chukī
vahshat-zada charāġh se khelī huī havā

sub.h huī to āftāb saarī bisāt ulaT gayā
raat usī maqām par raunaq-e-bazm thā charāġh

taḳhtī-e-shab pe likh diyā vaqt ne ye bhī vāqi.a
zard havā ke sāmne sīna-sipar rahā charāġh

ishq-o-talab kī raah meñ bād-e-havas bhī tez thī
maiñ ne jalāyā rāt-bhar kar ke ḳhudā ḳhudā charāġh

koī ḳhabar na lā sakī jis kī havā-e-tund bhī
rakhte haiñ is maqām kā saarā atā-patā charāġh

ek hī ghar meñ rakh diye kis ne judā judā charāġh
tere liye jalā charāġh mere liye bujhā charāġh

vādī-e-jāñ meñ daf.atan kaisī ye raushnī huī
kis kī nazar ne kar diye manzar-e-shab meñ vā charāġh

kaun thā mere rū-ba-rū ālam-e-vajd-o-hāl meñ
kis kī nigāh-e-lutf se ban gayā aa.ina charāġh

vaqt-e-sahar jo pūchh le koī to kyā batā.ūñgā
tāq-e-junūñ pe rāt-bhar kis ke liye jalā charāġh

mujh ko 'ziyā' vo chāhiye ghar jo mirā ujaal de
merā na mas.ala qamar merā na mudda.ā charāġh

bujhā ke rakh de ye koshish bahut havā kī thī
magar charāġh meñ kuchh raushnī anā kī thī

maiñ na dāmān-e-charāġh-e-be-navā ban kar jalā
thī talab jhoñke kī mujh ko aur tū jhoñkā na thā

tayyār rakho charāg apne
sūraj ko zavāl ho gayā hai

haiñ āñdhiyoñ meñ bhī raushan charāġh-e-haq 'afzal'
añdhere kaise samajh paa.eñ raushnī kā mizāj

usī kā hukm hai tārīk ghar ko rakhne kā
magar charāġh-e-dil-o-jāñ jalā ke dekhtā hai

fardā ko duur hī se hamārā salām hai
dil apnā shaam hī se charāġh-e-sahar huā

phire hai ai charḳh tū to bāñdhe shikam pe ḳhurshīd kā ye gurda
kahe na kyūñkar ki gurisna ho charāġh raushan murād hāsil

asīr-e-kunj-e-qafas to ho tum ye andalībo sadā ye bolo
shitāb yā-rab charāġh-e-gul se ho baaġh raushan murād hāsil

jigar kā juuñ sham.a kaash yā-rab ho daaġh raushan murād hāsil
ki dil ko lau lag rahī yahī hai charāġh raushan murād hāsil