Tags-Charagh

nīm-vā āñkhoñ se mujh ko dekh kar
gul huā jaatā hai ik būḌhā charāġh

andarūn-e-zāt tak khultā huā
jism ke jañgal meñ ik ugtā charāġh

lo koī tajsīm kar paayā kahāñ
mom ban kar rāt-bhar pighlā charāġh

tāq-e-jāñ kī gul huī afsurdagī
aas ne ummīd kā rakkhā charāġh

sāhiloñ kī nazar kar aa.ī havā
minnatoñ kā ek man-chāhā charāġh

maiñ kisī kī raat kā tanhā charāġh
itnā sunñā thā ki phir mahkā charāġh

tīrgī ke dā.ere meñ rakh gayā
ek saaya aa ke phir jaltā charāġh

ḳhvāb meñ donoñ ne dekhī raushnī
niiñd meñ mil baañT kar DhūñDā charāġh

jo dasht meñ bhī jalāte the fasl-e-gul ke charāġh
maiñ shahr meñ bhī vahī aable talāsh karūñ

ho raqīb-e-murda-shau par ho na kyuuñ raushan-bayāñ
yaañ charāġh-e-gor-o-sham-e-anjuman donoñ haiñ ek

ḳhayāl-e-zulf meñ chhā.ī ye tīrgī shab-e-hijr
ki ḳhāl-e-chehra-e-zaḳhmī charāġh-e-ḳhāna huā

faroġh-e-dil kā sabab ho ga.ī bujhī jo havas
sharār-e-kushta se raushan charāġh-e-ḳhāna huā

huā faroġh jo mujh ko ġham-e-zamāna huā
paḌā jo daaġh jigar meñ charāġh-e-ḳhāna huā

ham ne un tund-havāoñ meñ jalā.e haiñ charāġh
jin havāoñ ne ulaT dī haiñ bisāteñ aksar

jalegā jitnā bhī duniyā ko raushnī degā
charāġh-e-ilm-o-hunar hai ise bujhānā kyā

kidhar kidhar se havāoñ ke sāmne aa.uuñ
charāġh kyā hai mire vāste vabāl sā hai

is ghar meñ koī chiiz kisī aur kī nahīñ
ye phuul ye charāġh fasānā usī kā hai

zarā lau charāġh kī kam karo mirā dukh hai phir se utaar par
jise sun ke ashk chhalak paḌeñ vahī dhun bajāo sitār par

qurbāñ kamān-e-abrū-e-maulā pe jaan o dil
gar māh-e-nau kaheñ to hai tashbīh mubtazil

taḌapte rah ga.e din meñ bhī raushnī ke liye
charāġh bechne vāloñ ko mash.lā na milā