Tags-Chehra

ḳhauf nā-fahmī-e-mardum se mujhe aatā hai
gaav ḳhar hone lage sūrat-e-insāñ paidā

dil jins-e-mohabbat kā ḳharīdār nahīñ hai
pahlī sī vo ab sūrat-bāzār nahīñ hai

haañ magar barg-e-zard kī sūrat
sub.h ko maiñ bhī shaam kartā huuñ

sansār ke us paar ik is tarah kī bastī ho
jo sadiyoñ se insāñ kī sūrat ko tarastī ho

phir yuuñ huā ki zabt kī sūrat nahīñ rahī
aur shahr-e-be-navā ke ġhazāl aa.ine hue

bahar-sūrat hai har sūrat izāfī
nazar aatā hai jo vaisā nahīñ hai

shakl aur badaltī hai jab shakl badalte haiñ
ham sūrat-e-ashk aksar be-pāñv bhī chalte haiñ

masīhā.ī pe vo kāfir agar īmān le aa.e
shifā kī shakl meñ bīmār kī sūrat nikal aa.e

kisī sūrat agar iz.hār kī sūrat nikal aa.e
to mumkin hai kisī se pyaar kī sūrat nikal aa.e

bahut din ho ga.e 'arshad' vo mukhḌā chāñd sā dekhe
duā karnā koī dīdār kī sūrat nikal aa.e

koī to mo.ajaza aisā bhī ho apnī mohabbat meñ
tire inkār se iqrār kī sūrat nikal aa.e

agar vo bevafā zid chhoḌ de aur Thiik ho jaa.e
to shāyad phir mire ghar-bār kī sūrat nikal aa.e

dil-e-vārufta-e-dīdār kī allāh re mahviyyat
tasavvur meñ tire vo terī sūrat bhuul jaatā hai

ġham rag-o-pai meñ utartā hai lahū kī sūrat
dard palkoñ pe laraztā huā ik aañsū hai

kis se ho saktā hai jo is ne kiyā aalam ke saath
sūrat-e-ḳhākī meñ kaisā kuchh dam-e-ījād daad

koī pahchāne to kyā pahchāne
kabhī sūrat kabhī saayā huuñ maiñ

apnī sūrat ko tarastā huuñ maiñ
aa.ina DhūñDne niklā huuñ maiñ

kuchh tabī.at hī milī thī aisī chain se jiine kī sūrat na huī
jis ko chāhā use apnā na sake jo milā us se mohabbat na huī

dil ko kyuuñ kar 'jamīla' maiñ pheñkūñ
kisī sūrat judā nahīñ hotā

mai ḳhuld meñ hogī sūrat-e-hūr
maiḳhāne meñ mushkil hai parī kī