Tags-Chehra

vahī pyāsī zamīñ hai halqa-e-zanjīr kī sūrat
vahī ik āsmāñ jis ke tale shabnam meñ rahte haiñ

phir se kah de ki tirī manzil-e-shauq
merā dil hai mirī sūrat to nahīñ

ek aise vaqt meñ jab zindagī bhī maut lage
'riyāz' kaun sī sūrat ho dil bahalne kī

ḳhud ko rakhnā bhī nahīñ jins-e-girāñ kī sūrat
bikne vāloñ ke bhī me.aar banāne haiñ mujhe

chamak uThe mirī āñkhoñ meñ ashk kī sūrat
jo aag dil meñ hai raushan zabāñ se zāhir ho

kisī sūrat to dil ko shaad karnā
hameñ dushman samajh kar yaad karnā

ajiib shai hai ki sūrat badaltī jaatī hai
ye shaam jaise maqābir meñ Dhaltī jaatī hai

hūreñ bhī achchhī haiñ ai zāhid magar
in parī-zādoñ kī sūrat aur hai

ahl-e-ma.ānī juz na būjhegā koī is ramz ko
ham ne paayā hai ḳhudā ko sūrat-e-insāñ ke biich

ek sūrat tirī banāne meñ
rañg masrūf haiñ zamāne meñ

ḳhūbsūrat dikhā.ī detī hai
gar yahī raat sub.h ko dekho

husn-e-sūrat pe na jā dekh vahīñ ma.anī ko
ek haiñ ka.aba-o-but-ḳhāna kahāñ hai kuchh aur

gard-e-rah ban ke jo yuuñ baiThā huuñ
sūrat-e-sho.ala uThā kartā thā

adā pariyoñ kī sūrat huur kī āñkheñ ġhazāloñ kī
ġharaz māñge kī har ik chiiz hai in husn vāloñ kī

ham jis ke intizār meñ jaage tamām raat
aayā bhī vo to ḳhvāb kī sūrat guzar gayā

kuchh maiñ ḳhud bhī har ik shaḳhs kī bātoñ meñ aa jaatā huuñ
kuchh vaise bhī us ne mujh ko sūrat bholī-bhālī dī

kuchh nahīñ tishnagī-e-dīda-e-bīnā kā ilaaj
ḳhvāb tak meñ bhī koī sūrat-e-dariyā nahīñ hai

ye mohabbat nahīñ kuchh aur hai sūrat 'shāhīñ'
tum maza le ke jo sunte ho burā.ī us kī

dekhā to shagufta sā lagā phuul kī sūrat
utrā to mirī ruuh meñ ḳhanjar kī tarah thā