Tags-Chehra

nikālo koī to sūrat ki tīrgī kam ho
hamārā ghar hī jalā do jo raushnī kam ho

us kī bhī nikal aatī hai iz.hār kī sūrat
jis shaḳhs ko lafzoñ kā sahārā nahīñ miltā

badan baiThā hai kab se kāsa-e-ummīd kī sūrat
so de kar vasl kī ḳhairāt ruḳhsat kyuuñ nahīñ karte

habs kā shahr hai aur us meñ kisī bhī sūrat
saañs lene kī sahūlat nahīñ dī jā saktī

sūrat aur sīrat meñ imtiyāz mushkil hai
hai har ek chehre par ek dūsrā chehra

hausle kyā hue chaḌhte hue dariyāoñ ke
regzāroñ meñ kahāñ kho ga.ī jū kī sūrat

zindagī chaak huī kyā ho rafū kī sūrat
mil ga.ī ḳhaak meñ ab zauq-e-numū kī sūrat

zā.iqe talḳh hue aañkh se vahshat Tapkī
kaun yaad aayā 'jamāl' aaj adū kī sūrat

dukh-bharī shaam ke neze pe sisakte hue log
zarre zarre se Tapaktī man-o-tū kī sūrat

ḳhvāhish-e-sīm-badan se huā vahshat kā nuzūl
nashsha-e-jism ne kyā kar dī lahū kī sūrat

aql harīs-e-ḳhār-o-ḳhas sūrat-e-shola-e-havas
daulat-e-soz-e-jāvedāñ aql ke haath aa.e kyuuñ

ai yād-e-yār abr kī sūrat kabhī baras
dariyā-e-dil ko dard kā sailāb chāhiye

jhulastī dhuup bārish sard rāteñ
ba-har-sūrat 'ziyā' ham ne basar kī

ta.alluq kī yahī sūrat rahegī kyā hamesha
maiñ ab uktā chukā huuñ terī is vāraftagī se

ḳhasāre meñ rahe lekin na chhoḌī sādgī ham ne
ba-har-sūrat nibhā.ī dushmanoñ se dostī ham ne

jab apne paas pyaar kī sūrat nahīñ rahī
chhoḌo ḳhayāl-e-dost ki ḳhvāboñ meñ kuchh nahīñ

chhoḌ de vo mujhe taklīf meñ mumkin to nahīñ
aur agar aisī kabhī sūrat-e-hāl aa jaa.e

safha-e-hastī-e-fānī pe ba-har-sūrat-e-shauq
jo lakīreñ nazar aatī haiñ vo ham khīñchte haiñ

bārgāh-e-dirham-o-dīnār hai
har koī miskīn sūrat hai yahāñ

hue pareshān sab musāfir na niklī sūrat koī bil-āḳhir
jo raah masdūd thī to kyūñkar idhar se jaate udhar se aate