Tags-Chehra

koī sūrat nahīñ ḳharābī kī
kis ḳharābe meñ bas rahā hai jism

ishq vāloñ kī shart aisī hai
apnī sūrat ko chāñd sā kiije

bahar-sūrat qayāmat hai vo aa.eñ yā chale jaa.eñ
jo aa.e to sukūñ chhīnā ga.e to jaan taḌpā.ī

Dūbte sūraj kī sūrat merā chehra dekh lo
phir kahāñ bāb-e-ma.ānī DhūñDne jā.eñge log

badal dekhūñ charāġh-e-shauq se maiñ bhī charāġh apnā
mere ghar se nikal jaa.e isī sūrat dhuāñ shāyad

vaise to dil ke TūTne kā kuchh nahīñ malāl
lekin tire jamāl kī sūrat isī meñ thī

ārzū-e-vasl-e-qātil itnī hai mujh zaar ko
huuñ hama-tan sūrat-e-āġhosh ḳhanjar kī tarah

tauba tauba kyā ġhazab saaqī kī ġhaflat ne kiyā
sab kī sūrat dekhtā huuñ riñd-e-be-zar kī tarah

ḳhud se bhī baḌh ke us pe bharosa na kījiye
vo aa.ina hai dekhiye sūrat bhī le na jaa.e

vaqt ko aate na jaate na guzarte dekhā
na utarte hue dekhā kabhī ilhām kī sūrat

hazāroñ chāra-gar haiñ aur ġham baḌhte hī jaate haiñ
jo sūrat dekhiye tasvīr-e-mātam hotī jaatī hai

lauT aao jo kabhī raam kī sūrat tum to
man kā sunsān avadh diip nagar ho jaa.e

jo bhī dukh dard musībat kā piye vish hañs kar
kyuuñ na suqrāt kī sūrat vo amar ho jaa.e

huuñ muntazir kisī lams-nigāh kā kab se
maiñ ik kitāb kī sūrat kisī dukān meñ huuñ

yaqīñ jaano ki muñh dekhī mohabbat ham nahiñ rakhte
vo ā.īna hai jo vārafta-e-sūrat-parastī hai

ishq kahte haiñ kise husn hai kyā kuchh bhī nahīñ
merī āñkheñ tirī sūrat ke sivā kuchh bhī nahīñ

ab dekh ke apnī sūrat ko ik choT sī dil par lagtī hai
guzre hue lamhe kahte haiñ ā.īna bhī patthar hotā hai

ḳhush na ho ham jo ho ga.e ḳhāmosh
sūrat-e-ehtijāj aur hai kuchh

mujh meñ aur mere raqīboñ meñ hai farq bas itnā thoḌā sā
un ko sūrat dikhlāte haiñ mujh ko āñkheñ dikhlāte haiñ

go husn kī sūrat haiñ mirī samt ravāñ bhī
ik ḳhvāb sī lagtī haiñ mujhe raushaniyāñ bhī