Tags-Chehra

nazar un kī kahīñ putlī kahīñ āñkheñ kahīñ un kī
ye gardish dūsrī sūrat kī hai purkār rahne deñ

qafas meñ bekasoñ ko kis ne pūchhā kaun pūchhegā
kahāñ tak zaḳhm kī sūrat meñ vā minqār rahne deñ

kyā ho tum dhuup kī sūrat kabhī aa chubhte ho
aur kabhī tez kabhī narm havā lagte ho

mujh mast ko kyuuñ bhaa.e na vo sāñvlī sūrat
jī dauḌe hai mai-kash kā ġhizā-e-namakīñ par

vo haTe aañkh ke aage se to bas sūrat-e-aks
maiñ bhī us ā.ina-ḳhāne se nikal jā.ūñgā

mujh se kahtā hai mirā dūd-e-jigar sūrat-e-sham.a
dil meñ rokoge to maiñ sar se nikal jā.ūñgā

tirī ḳhvāhish kisī imkāñ kī sūrat
hamesha mujh meñ tah-dar-tah rahī hai

apnī sūrat kahāñ rahī 'vāsil'
un kī sūrat kā sab tamāshā hai

jab se ki nigāhoñ meñ basī hai tirī sūrat
qur.ān ke aurāq ulaT kar nahīñ dekhā

kuchh tabī.at hī milī thī aisī chain se jiine kī sūrat na huī
jis ko chāhā use apnā na sake jo milā us se mohabbat na huī

vo raheñ sāmne mere to tasallī varna
dil bhī kambaḳht bhaTaktā hai nazar kī sūrat

chand aañsū hī mire dil pe 'falak' gir jaa.eñ
ātish-e-ġham se sulagtā hai sharar kī sūrat

ham to manzil ke talabgār the lekin manzil
aage baḌhtī hī ga.ī rāhguzar kī sūrat

vo ga.e ghar se to phir ham ne bhī ghar ko chhoḌā
ham se dekhī ga.ī dīvār na dar kī sūrat

kū-e-jānāñ meñ nahīñ koī guzar kī sūrat
dil uḌā phirtā hai TuuTe hue par kī sūrat

baiTh jaa.eñ kisī goshe meñ simaT kar ai dost
kaun gardish meñ rahe shams-o-qamar kī sūrat

merī qismat meñ mohabbat ne yahī likkhā hai
dard bhī dil meñ rahe zaḳhm-e-jigar kī sūrat

ruuh afsurda pareshān ḳhayālāt meñ gum
aisī pahle kabhī dekhī thī bashar kī sūrat

ho saktī hai paidā koī tabḳhīr kī sūrat
dil tañg-o-pareshān bhī ho saktā hai is se

mujhe ḳhabar hai kahāñ huuñ maiñ kaun huuñ 'aḳhtar'
ki mere naam se sūrat girī huī merī