Tags-Chehra

tire hī dil meñ hai jalva-farmā butoñ kī sūrat ḳhudā kā jaadū
yahī hai dair aur yahī hai ka.aba yahī mohabbat kā ghar hai pyāre

ham ne paa.ī lazzat-e-dīdār lekin duur se
un kī sūrat dekh lī sau baar lekin duur se

shīsha-e-dil ke har TukḌe meñ
ek ik sūrat kis ko chāheñ

fasl-e-gul aa.ī to kyā kyā sūrateñ bāham huiiñ
chehra chehra ek sūrat DhūñDhnā achchhā lagā

koī sūrat se gar safā ho
ā.ina-e-dil ḳhudā-numā ho

zindagī naam ranj-o-ġham hī sahī
phir bhī kis darja ḳhūbsūrat hai

ilāhī mere us ke vo ham-āġhoshī kī sūrat ho
ki jaise dil kī hai pechīdgī mash.hūr pahlū meñ

hai ā.īna tirī sūrat pe hairāñ
maiñ ā.īne kī hairānī ke sadqe

misl-e-barq ik shab hañsāyā aap ne
abr kī sūrat rulāyā ek din

milā to shaam ke saa.e meñ ek pal vo bhī
bas ek hijr kī sūrat visāl thā us kā

khā jā.egā ye jaan ko āzār dekhnā
pahroñ kisī ko sūrat-e-dīvār dekhnā

sūkhe laboñ kī pyaas bujhāne ke vāste
kal raat chāñd barf kī sūrat pighal gayā

ka.ī patañg kī sūrat ḳhalā meñ Duub gayā
vo jitnā tez thā itnā hī lā-ubālī thā

kabhī salīb kī sūrat kabhī hilālī thā
mirī nigāh meñ ik paikar-e-ḳhayālī thā

kis liye dekhtī ho ā.īna
tum to ḳhud se bhī ḳhūbsūrat ho

dil-e-sad-chāk kī banā sūrat
zulf par dil gayā hai shāne kā

hai masīhā.ī kā da.avā to jilā le aa kar
dam laboñ par hai zarā dekh to sūrat merī

unheñ maiñ sher kī sūrat kabhī ugal dūñgā
jo dil meñ dard ke tūfān bante jaate haiñ

gar dekhiye to ā.īna-e-qad-numā kī shakl
sūrat maiñ ban rahā huuñ tamām intizār kī

sūrat-e-sham.a tire sāmne raushan haiñ jo phuul
un kī kirnoñ meñ nahā zauq-e-samā.at pe na jā