Tags-Chehra

maiñ kis gintī meñ huuñ aur ik mire dil kī haqīqat kyā
hazāroñ jaan dete haiñ vo sūrat hī kuchh aisī hai

uḌā phirtā hai panchhī canvas par
musavvir kī ajab sūrat-garī hai

farishta sūrat duā kā saaya vo ruup insāñ kā dhaar aayā
hai us se duurī azaab mujh ko hai us kā milnā savāb jaisā

dar-parda vo hī ma.anī muqavvam na hoñ agar
sūrat na pakḌe kaam falak ke sabāt kā

ḳhāna-vīrāñ-sāzī-e-hairat tamāshā kījiye
sūrat-e-naqsh-e-qadam huuñ rafta-e-raftār-e-dost

rāh-e-ulfat ne kuchh aisī mirī sūrat badlī
dāman-e-dasht chhupā.e to chhupā.e na bane

maiñ chhū ke dekh rahī thī ki sabza-e-ruḳh par
gulāb-e-surḳh kī sūrat tirā jamāl khilā

aise hañsmukh ko sham.a se tashbīh
sham.a-e-majlis kī ronī sūrat hai

terī sūrat par gumān-e-dasht-o-sahrā haa.e haa.e
tere qadmoñ meñ bahāreñ zindagī ai zindagī

ye ik sūrat hai gar khīñche vo mere yaar kā naqsha
maiñ kab ma.anoñ huuñ yuuñ maanī likhe gar laakh tasvīreñ

sūrat meñ rañg-o-nūr kii, phūloñ kii, ham kahīñ
lauh-e-jahāñ pe harf-e-mukarrar bhī ā.eñge

kis ko dekhā un kī sūrat dekh kar
jī meñ aatā hai ki sajda kījiye

bayāñ jo jo ki sūrat tujh se kī hai maiñ ne ai qāsid
tū us ke kaan meñ jhuk kar usī sūrat se kah diijo

vasl kī ab nahīñ koī sūrat
duur se roz dekhnā hai mujhe

tujhe chhū kar bhī tujhe pā na sakeñge to hameñ
sūrat-e-dard tire dil meñ utarnā hogā

ye ḳhauf dil meñ ubhartā hai dard kī sūrat
badal na jaa.e kahīñ e'tibār kā mausam

ā.īna-sifat vaqt tirā husn haiñ ham log
kal aa.ine tarseñge to sūrat na milegī

ta.abīr nazar aane lagī ḳhvāb kī sūrat
ab ḳhvāb hī dekhoge bashārat na milegī

paḌe haiñ paañv kī sūrat zabān meñ ghaTTe
ye qāsidoñ ko diye haiñ payām uTh uTh kar

maiñ apne jism ke murda ajā.ib-ghar kī zīnat huuñ
mujhe dīmak kī sūrat chāTtī hai zindagī merī