Tags-Chehra

kahīñ sūraj bhī qaidī hai kisī tārīk zindāñ meñ
kahīñ zarre bhī tābāñ sūrat-e-mahtāb haiñ saare

band kyuuñ ashk na hoñ tab-e-ravāñ se ai 'tūr'
vo bhī to sūrat-e-aflāk nahīñ khultā kuchh

mujhe ghar meñ gardish hai patlī kī sūrat
ye e.ajāz hai chashm-e-sehr-āfrīñ kā

ab ye sūrat hai mohabbat meñ tumhārī ai jaan
apne begāne mirī shakl se bezār haiñ sab

chhoTe chhoTe ka.ī be-faiz mafādāt ke saath
log zinda haiñ ajab sūrat-e-hālāt ke saath

vo sūrat dekh lī ham ne to phir kuchh bhī na dekhā
abhī varna paḌī thī ek duniyā dekhne ko

ġhurūr-e-husn tujhe jis qadar ho zebā hai
ḳhudā ke fazl se sūrat bhī hai shabāb bhī hai

zulf zanjīr-e-sitam teġh-e-jafā haiñ abrū
dil-e-vahshat-zada ab bachne kī sūrat kyā hai

hujūm-e-rañj-o-ġham ne is qadar mujh ko rulāyā hai
ki ab rāhat kī sūrat mujh se pahchānī nahīñ jaatī

ab ye sūrat hai jān-e-jāñ ki tujhe
bhūlne meñ mirī bhalā.ī hai

ā.ina-ḳhānoñ meñ rañgoñ ke
apnī hī sūrat ko sarāhā

begāna koī nazar na aayā
aa.ina bhī sūrat-āshnā hai

unheñ apnī sūrat pe yuuñ naaz kab thā
mire ishq-e-rusvā ko 'aḳhtar' duā deñ

sirf sūrat kā band na.iiñ 'nājī'
āshiq-e-sāhab-e-ma.ānī hai

koī sūrat murattab ho rahī hai
ḳhayāloñ kī pareshānī mubārak

kabhī maiñ asīr-e-makāñ huā kabhī māvarā-e-zamāñ huā
kabhī aaj meñ kabhī kal meñ huuñ maiñ ajiib sūrat-e-hāl huuñ

hai mire shahr meñ kitne hī shikārī chehre
apnī sūrat meñ jo rakhte nahīñ sūrat apnī

aadmī marsiyoñ kī sūrat meñ
likh rahā hai bashārateñ kyā kyā

bhā ga.iiñ dil ko adā.eñ un kī
khub ga.ī āñkhoñ meñ sūrat hī to hai

narm hote hī badal jaatī hai sūrat merī
yak-ba-yak chaak pe hone kā gumāñ hotā hai