Tags-Chehra

kisī sūrat alag hone na paa.ī
tirī tasvīr merī shā.erī se

har shakl hai mujh meñ mirī sūrat ke alāva
ab is se ziyāda to nikharne kā nahīñ maiñ

use to apnī bhī sūrat nazar nahīñ aatī
vo apne shīsha-e-dil kī to gard saaf kare

hai yahī sūrat to ham se rāz-poshī ho chukī
chashm tar lab ḳhushk chehra zard ye naqsha burā

agar qarīb se dekho to jaan logī tum
jahāñ hai saañp kī sūrat vajūd se lipTā

pare hai sūrat-e-ḳhūbāñ talāsh-e-ma.anī se
mile na aab bhī kholeñ girah jo gauhar kī

mahfil-e-hashr meñ ye kaun hai mīr-e-majlis
ye to ham ne koī dekhī huī sūrat dekhī

quvvateñ zabt kī har chand sambhāle thiiñ mujhe
phir bhī Darte hue maiñ ne tirī sūrat dekhī

dūr-andesh marīzoñ kī ye aadat dekhī
har taraf dekh liyā jab tirī sūrat dekhī

unheñ ma.alūm haiñ majbūr jeboñ ke taqāze sab
vo in meñ ḳhūbsūrat sā bahāna chhoḌ dete haiñ

kyā kyā sher kiye haiñ tum ne naqsh ġhazal kī sūrat meñ
ham tum ko 'naqqāsh' kaheñge tum shā.ir kahlāo to kyā

apne badan ko sūrat aisī nazr-e-salīb-e-zulm karo
sone kī ma.asūm salībeñ sīnoñ par laTkāo to kyā

huī sūrat na kuchh apnī shifā kī
davā kī muddatoñ barsoñ duā kī

un par bhī hañstī thī duniyā āvāzeñ kastī thī duniyā
'jālib' apnī hī sūrat the ishq meñ jaañ se jaane vaale

vo sūrat hai dilkash ki is zulm par
zamāna tirā mubtalā ho gayā

mire ḳhudā kisī sūrat use milā mujh se
mire vajūd kā hissa na rakh judā mujh se

manzileñ raah meñ thiiñ naqsh-e-qadam kī sūrat
ham ne muḌ kar bhī na dekhā kisī manzil kī taraf

ġham jo baḳhshā hai mujhe tū ne ġhazal kī sūrat
ḳhuun pī pī ke shab-o-roz javāñ hotā hai

hasrat-e-gah-e-ālam meñ tamannā kā qadam
illā kī taraf sūrat-e-lā aa.egā