Tags-Chehra

yuuñ na fasurda-ḳhātir rah
ġhuncha-o-gul kī sūrat khil

isī sūrat se taskīn-e-dil-e-nāshād karte haiñ
abhī tak yaad aate ho abhī tak yaad karte haiñ

teġh-bar-dosh sipar haath meñ dāman gardāñ
ye banā sūrat-e-ḳhuñḳhār kahāñ jaatā hai

kitne dukh ke din biite haiñ is kā bhī thā hosh kahāñ
apne haal ko kuchh samjhā huuñ sūrat se ġham-ḳhvāroñ kī

ye sham.a' khaTaktī hai agar ḳhaar kī sūrat
nazroñ se ise apnī girā kyuuñ nahīñ dete

hañsā chaman meñ jo dil dekh sūrat-e-sayyād
ye murġh daane se aur daam se nahīñ vāqif

so kis se kījiye zikr-e-nazākat-e-ḳhad-o-ḳhāl
koī milā hī nahīñ sūrat-āshnā us kā

hoñT par sach chup kī sūrat khil uThā
raaz ifshā jab huā duniyā hai kaun

aañkh meñ manzar to aa sakte haiñ sūrat oḌh kar
aa.ine to aks se zanjīr ho sakte nahīñ

tirī sūrat mujhe batātī hai
yaad merī tujhe bhī aatī hai

ham-zād kī sūrat hai mire yaar kī sūrat
maiñ kaise nikal saktā huuñ chālāk se aage

ḳhalvat-kada-e-dil pe zabūñ-hālī-e-bisyār
hai sūrat ganjīna-e-alfāz-o-ma.ānī

koī maqtal ko gayā thā muddatoñ pahle magar
hai dar-e-ḳhema pe ab tak sūrat-e-tasvīr kaun

kabhī shabnam kā qatra ban ke chamko lāla-o-gul par
kabhī dariyāoñ kī sūrat bayābānoñ meñ aa jaao

sūrat na yuuñ dikhā.e unheñ baar baar chāñd
paidā kare hasīnoñ meñ kuchh e'tibār chāñd

vo dil kyā jo dilbar kī sūrat na pakḌe
vo majnūñ nahīñ hai jo lailā nahīñ hai

be-hunar honā bhī hai maut kī sūrat ai dost
zinda rahne ke liye koī hunar DhūñDte haiñ

DhūñDhtī hai nigāh bhagdaḌ meñ
koī sūrat ho jānī-pahchānī

parī-sūrat nazāra DhūñDte haiñ
musāfir haiñ sahārā DhūñDte haiñ