Tags-Chehra

usī sūrat se din Dhaltā hai sūraj Duub jaatā hai
usī sūrat se shabnam meñ har ik zarra nahātā hai

pas-e-qaus-e-quzah ik sūrat-e-mahtāb kī jhilmil
maiñ is jhilmil ko pahroñ dekhtā rahtā huuñ bārish meñ

kyuuñ sabhī meñ DhūñDte ho ḳhūbiyāñ
ḳhūbsūrat ḳhāmiyāñ haiñ aur kyā

munqalib sūrat-e-hālāt bhī ho jaatī hai
din bhale hoñ to karāmāt bhī ho jaatī hai

shauq vāloñ kī hazīñ mahfil-e-shab meñ ab bhī
āmad-e-sub.h kī sūrat tirā naam aatā hai

mahīne vasl ke ghaḌiyoñ kī sūrat uḌte jaate haiñ
magar ghaḌiyāñ judā.ī kī guzartī haiñ mahīnoñ meñ

un ko kyā dhokā huā mujh nā-tavāñ ko dekh
merī sūrat kyuuñ milāte haiñ mirī tasvīr se

ghaḌī ghaḌī hijr kī hai bahārī dikhā.e sūrat ḳhudā tumhārī
sunūñ vo bāteñ piyārī piyārī ajab adā se ajab bayāñ se

raunaq-e-jāñ na sahī sūrat-e-āseb sahī
mere ujḌe hue tārīk makāñ meñ aa jā

itnī umr meñ apne ma.anī kuchh na mile
dil meñ sūrat āñkhoñ meñ sapnā niklā

dil pe dard-e-ishq kā ek ek ehsāñ haa.e haa.e
jaan kī sūrat meñ koī dushman-e-jāñ haa.e haa.e

maiñ ne kahā thā us se aage chhupne kī kyā sūrat hogī
us ne kahā thā Darte kyuuñ ho aage qil.e bane hue haiñ

kyā koī tasvīr ban saktī hai sūrat ke baġhair
phir kisī se kyuuñ mile koī zarūrat ke baġhair

zabān muñh meñ hai tār-e-gunah kī sūrat
tumhārā hukm bajā hai kalām mat karnā

mirī chashm-e-tan-āsāñ ko basīrat mil ga.ī jab se
bahut jaanī huī sūrat bhī pahchānī nahīñ jaatī

sūrat to bhuul baiThā huuñ āvāz yaad hai
ik umr aur zehn girānī meñ aa.egā

husn-e-sūrat dekh kar rañg-e-tabī.at dekh kar
mahv-e-hairat huuñ savād-e-bazm-e-ġhurbat dekh kar

shaguft-e-gul meñ bhī zaḳhm-e-jigar kī sūrat hai
kisī se ek tabassum kā aasrā bhī nahīñ

tajallī ḳhud bhī parda hai magar jab dil se dekheñge
ba-har-sūrat nigāhoñ meñ vo sūrat hū-ba-hū hogī

ye ġhazab hai ki vo rūThā huā phirtā hai jo yaañ
ḳhvāb meñ bhī vahī sūrat nazar aa jaatī hai