Tags-Civilization

ye zabāñ ke saath hai tahzīb bhī
qābil-e-sad-nāz hai urdu zabāñ

de rahā hai gāliyāñ be-nutq har pīr-o-javāñ
vaah kyā kahnā tirī tahzīb kā hindostāñ

shāyad na.ī tahzīb kī me.arāj yahī hai
haq-go hī zamāne meñ ḳhatā-kār lage hai

miTtī huī tahzīb se nafrat na kiyā kar
chaupāl pe būḌhoñ kī kahānī bhī sunā kar

tahzīb-e-alam kahiye ki irfān-e-ġham-e-zāt
kahne ko to do lafz haiñ har baat baḌī hai

tez-rau tahzīb-e-ālam ko 'firāq'
ik zarā āhistagī darkār hai

ye mirā zabt hai yā terī adā kī tahzīb
rañg āñkhoñ meñ jhalaktā nahīñ armānoñ kā

ham kabhī ishq ko vahshat nahīñ banñe dete
dil kī tahzīb ko tohmat nahīñ banñe dete

dhabba nahīñ go dāman-e-tahzīb pe lekin
milte haiñ yahāñ banda-e-be-dām abhī tak

har ek fan kī azmat tahzīb-e-be-misālī
hai is se āshkāra koī nahīñ savālī

kyā hai tahzīb-e-maġhribī kā nishāñ
ūñchī ūñchī imāratoñ ke sivā

raushnī sham.a kī ḳhud gulū-gīr hai hañsnā tahzīb hai jalnā taqdīr hai
vo magar qatra-e-ashk-e-shabnam jise sub.h kī sab se pahlī kiran pā.egī

chhūTā na ham se dāman-e-tahzīb-e-anjuman
dushman zarā sī Dhiil pe be-bāk ho ga.e

hāsil huzūr-e-husn kī sar-mastiyāñ kahāñ
tahzīb-e-asr lauT ke jaane kidhar ga.ī

ta.alīm kā shor aisā tahzīb kā ġhul itnā
barakat jo nahīñ hotī niyyat kī ḳharābī hai

badan ke loch tak āzād hai vo
use tahzīb ne bāñdhā nahīñ hai

tarāsh kar na.ī tahzīb ke sanam ham log
''ba-sad vaqār zamāne ke āzaroñ meñ rahe

kar diyā sāhir-e-tahzīb ne patthar in ko
chehre lamhoñ ke vo resham kī naqāboñ meñ nahīñ

ḳhirad-ba-dosh hai tahzīb-e-nau magar phir bhī
junūñ-ba-dāmāñ tamaddun ko āgahī tarse

itnī tahzīb-e-rah-o-rasm to baaqī thī ki vo
laakh ranjish sahī va.ada to vafā karte the