Tags-Civilization

jañg vahshat se barbariyyat se
amn tahzīb o irtiqā ke liye

aap ne daur-e-jahālat se nikālā qaum ko
ilm aur tahzīb ke sāñche meñ Dhālā qaum ko

is daur ke shā.er meñ logo tahzīb o shu.ūr o soz kahāñ
me.aar vahī hai sheroñ kā jaisī hai jihālat bātoñ meñ

use bhī parda-e-tahzīb ko girānā hai
mujhe bhī paikar-e-nāyāb se nikalnā hai

na.ī tahzīb ke shahkār-e-azīm!
terī pur-kaif o tarab-ḳhez fazāoñ ko salām!

na.ī tahzīb ke ḳhākoñ ko sañvārā ham ne
ham se aḳhlāq kī tasvīr banā.ī na ga.ī

tū nazar bhar ke sar-e-bazm na dekh un ko 'nazīr'
is se rusvā.ī-e-tahzīb-e-nazar hotī hai

socho to baḌī chiiz hai tahzīb badan kī
varna ye faqat aag bujhāne ke liye haiñ

sair kaisī yahāñ tahzīb kī zanjīr bhī hai
ham to bas rauzan-e-dīvār se dar dekhte haiñ

bhiik bhī māñgo to tahzīb kā kaasa le kar
haath phailā ke ḳhazāna nahīñ māñgā jaatā

kahnā sunñā bhī ik vaz-e-tahzīb hai kahne sunñe meñ naqs-e-marātib nahīñ
ik zarā chup raheñ ham bhī gulzār meñ pās-e-rasm-e-hikāyāt-e-bulbul kareñ

diloñ ko dard kī tahzīb se ābād rakhtī hai
mohabbat meñ kisī ko koī ḳhamyāza nahīñ hotā

uchaTtī āñkhoñ se tahzīb kā safar kaisā
tū apne-āp ko tārīḳh ke udhar le jā

dil to tahzīb-e-anā kā hai parastār magar
kyā kare koī jo ho jaa.e ishāra us kā

abhī kāñToñ se bachātā huuñ maiñ apnā dāman
abhī nā-vāqif-e-tahzīb-e-gulistāñ huuñ maiñ

kuchh to irshād ho ai tamkinat-e-ān-e-jamāl
ishq shā.ista-e-tahzīb-e-junūñ hai ki nahīñ

unheñ na toliye tahzīb ke tarāzū meñ
gharoñ meñ un ke na chūlhe na diip jalte haiñ

yahāñ buland sadā.eñ lagā ġhubār uḌā
dayār-e-ishq hai tahzīb kā havāla nahīñ

na.ī tahzīb se saaqī ne aisī garm-joshī kī
ki āḳhir muslimoñ meñ ruuh phūñkī bāda-noshī kī

āftāb ubhrā hai jis din se na.ī tahzīb kā
ho gayā tārīk insāñ kā muqaddar aur bhī