Tags-Civilization

na.ī tahzīb meñ bhī maz.habī ta.alīm shāmil hai
magar yūñhī ki goyā āb-e-zamzam mai meñ dāḳhil hai

na.ī tahzīb ne ma.ashūq kā fashion badlā
card bhejūñ to mayassar ho mulāqāt mujhe

ham jo insānoñ kī tahzīb liye phirte haiñ
ham sā vahshī koī jañgal ke darindoñ meñ nahīñ

unheñ se nām-e-tamaddun ko joḌ rakkhā hai
jo apnī daulat-e-tahzīb bhī luTā baiThe

kabhī buzurgoñ se mīrās meñ jo paa.ī thī
vo saarī qadreñ vo tahzīb ham bhulā baiThe

tahzīb kā tasallut hai aa.ine se bāhar
tārīḳh ke safar kā vijdān aa.ine meñ

abhī tahzīb kā nauha na likhnā
abhī kuchh log urdu bolte haiñ

tahzīb DhūñDhtī hai kisī irtiqā kī shakl
iqbāl-mandiyoñ kā hai sūraj Dhalā huā

taqdīs ke sar meñ ḳhaak dekhī
tahzīb ke haath meñ subū hai

daaġh ab un kī nazar meñ haiñ sharāfat ke nishāñ
na.ī tahzīb kī maujoñ se dhule jaate haiñ

aaj insān kā insān lahū piitā hai
aaj tahzīb kā sultān yūñhī jiitā hai

majbūrī o dāvā-e-giraftāri-e-ulfat
har ahd meñ tahzīb ne ye Dhoñg rachā hai

tahzīb hī baaqī hai na ab sharm-o-hayā kuchh
kis darja ab insān ye bebāk huā hai

jitnā tahzīb-e-badan se maiñ sañvartā jā.ūñ
utnā hī TuuT ke andar se bikhartā jā.ūñ

tahzīb kī zanjīr se uljhā rahā maiñ bhī
tū bhī na baḌhā jism ke ādāb se aage

na.ī tahzīb se ye nasl-e-nau ab
bahut bebāk hotī jā rahī hai

bhuuk meñ ishq kī tahzīb bhī mar jaatī hai
chāñd ākāsh pe thālī kī tarah lagtā hai

āshnā tahzīb-e-ḳhāmoshī se honā shart hai
dosto gar vāqa.ī fariyād honā hai tumheñ

mil-jul ke ba-rañg-e-rañg-e-shīr-o-shakar donoñ ke nikharte haiñ jauhar
dariyāoñ ke sañgam se baḌh kar tahzīb kā sañgam hotā hai

ādāb-e-dostī se to vāqif kabhī na the
tahzīb-e-dushmanī se bhī nā-āshnā rahe