Tags-Crime

zindagī bhī haqīqat meñ ik jurm hai
umr bhar kāTtā hai sazā aadmī

na rahā junūn-e-ruḳh-e-vafā ye rasan ye daar karoge kyā
jinheñ jurm-e-ishq pe naaz thā vo gunāhgār chale ga.e

aisā dil-kash thā ki thī maut bhī manzūr hameñ
ham ne jis jurm kī kaaTī hai sazā zindāñ meñ

mujh se ab apnī zabāñ se kuchh kahā jaatā nahīñ
jurm kar ke bhī koī mujrim sazā paatā nahīñ

sabaq-e-be-gunahī tishna-e-takmīl bhī thā
ik nayā falsafa-e-jurm-o-sazā aur sahī

jañg hai jurm mohabbat hai ḳhilāf-e-tahzīb
ho chukā valvala-e-ahd-e-javānī paidā

mile jo jurm-e-vafā kī sazā yahīñ pe mile
hisāb apnā kahāñ hogā jo yahāñ na huā

vahī zulm bār-e-digar hai to phir
vahī jurm bār-e-digar kījiye

agar na jurm-e-mohabbat kī ye sazā hotī
to baat baat pe ham se ye be-ruḳhī kyā hai

sar-e-mahshar agar pursish huī mujh se to kah dūñgā
sarāpā jurm huuñ ashk-e-nadāmat le ke aayā huuñ

hameñ jo be-jurm pīste ho ye jānte ho ki kyā kareñge
ḳhudā ne chāhā to surma ho kar tumhārī āñkhoñ meñ jā kareñge

koī pābandī hai hañsne par na ronā jurm hai
itnī āzādī to hai dīvāngī ke naam par

zindagī ke jitne darvāze haiñ mujh pe band haiñ
dekhnā hadd-e-nazar se aage baḌh kar dekhnā bhī jurm hai

mohabbat nahīñ jurm koī jahāñ meñ
nazar meñ vo phir kyuuñ ḳhatāvār hogī

jab dil ne ḳhair-o-shar kī haqīqat ko pā liyā
har jurm thā buland sazā ke maqām se

shāyān-e-jurm-e-ishq na thī qaid-e-zindagī
jī shaad ho gayā rasan-o-dār dekh kar

be-jurm-o-ḳhatā jis kā ḳhuuñ hove ravā yaaro
us ḳhūbi-e-qismat kā naḳhchīr hai aur maiñ huuñ

hai mujh ko e'tirāf-e-jurm-e-ulfat
ḳhatā ye be-irāda ho ga.ī hai