Tags-Crime

zabāñ pe nām-e-mohabbat bhī jurm thā ya.anī
ham un se jurm-e-mohabbat bhī baḳhshvā na sake

ham se be-jurm vo kūcha chhūTā
shā.eq-e-bāġh-e-iram bhī to na the

bhuuk ke qānūn meñ īmān-dārī jurm hai
aur be-īmāniyoñ par sharmsārī jurm hai

hai abas jurm-e-ishq par ilzām
jab ḳhatā-vār bhī ḳhatā jaane

jurm-e-iz.hār-e-tamannā aañkh ke sar aa gayā
chor jo dil meñ chhupā thā aaj bāhar aa gayā

vahī munsifoñ kī rivāyateñ vahī faisloñ kī ibārateñ
mirā jurm to koī aur thā pa mirī sazā koī aur hai

kyā patā kis jurm kī kis ko sazā detā huuñ maiñ
rañg sā ik bāñdhtā huuñ phir bhulā detā huuñ maiñ

banā huuñ jis se ḳhatā-kār sab kī ā.ankhoñ meñ
vo jurm mujh se batā baar baar kaise huā

mire jurm-e-ishq kī is qadar mujhe ai nadīm sazā na de
mire dil pe itnī jafā na kar mujhe yuuñ nazar se girā na de

ḳhud apne jurm kā mujrim ko e'tirāf na thā
magar ye jazba ba-nām-e-junūñ muaaf na thā

agar hai jurm mohabbat to phir takalluf kyā
madār-e-jurm huuñ taqsīr huuñ ḳhatā huuñ maiñ

khul jā.egā bharam tirī mīzān-e-adl kā
do ek harf-e-jurm agar kah diyā gayā

munharif tārīkiyoñ ke saaz par
koī raushan giit gaanā jurm hai

ashk-rezī kī ijāzat hai magar
ehtijājan muskurānā jurm hai

dosto ke kaam aanā jurm hai
ḳhud ko dariyā-dil banānā jurm hai

pattharoñ ke baaġh meñ sājid-'asar'
kāñch ke paude lagānā jurm hai

sar jhukānā achchhī aadat hai magar
tañg aa kar sar uThānā jurm hai

jab numā.ish kī chamak ho nā-guzīr
apnī raunaq bhuul jaanā jurm hai

dil jurm-e-mohabbat se kabhī rah na sakā baaz
hālāñki bahut baar sazā paa.e hue thā

mire jurm-e-vafā kā faisla kuchh is tarah hogā
sazā kā hukm faurī aur samā.at sarsarī hogī