Tags-Cruelty

jab use zulm-o-sitam hī meñ maza aatā hai
kisī nāshād ko kyā shaad karegī duniyā

duniyā ko tum dekh chuke ho
zulm kī aag meñ jaltī duniyā

bas karo o merī rone vaalī āñkhoñ bas karo
ab to apne zulm par vo bhī pashemāñ ho ga.iiñ

vo zulm bhī ab zulm kī had tak nahīñ karte
āḳhir unheñ kis baat kā ehsās huā hai

ḳhudā samjhe ye kyā sayyād o gulchīñ zulm karte haiñ
guloñ ko toḌte haiñ bulbuloñ ke par katarte haiñ

zulm ke haath pe bai.at kā tasavvur ho to maiñ
sabr aur jur.at-e-inkār se pahchānā jā.ūñ

asīr-e-nau kī ḳhabar le aa kar zarā tū sayyād-e-zulm-pesha
yahāñ talak huuñ qafas meñ taḌpā ki mere saare haiñ dhajjiyāñ par

us ne bhī uThānā thā alam zulm-o-sitam kā
neze meñ jigar us ne pironā thā hamārā

zulm ke sāmne ho sīna-sipar
hausla itnā ham-nafas meñ nahīñ

zulm go us ne bahut baar kiye
lab pe mere na shikāyat aa.ī

khile rahte haiñ zaḳhm-e-dil hamesha
ḳhizāñ ne zulm to Dhāyā bahut hai

ai husn zamāne ke tevar bhī to samjhā kar
ab zulm se baaz aa jā ab jaur se tauba kar

kahte haiñ zulm ke ba.ad aah karoge to kyā
lashkar-e-jaur-o-jafā meñ ye alam aur sahī

ḳhud pe ye zulm gavārā nahīñ hogā ham se
ham to sho.aloñ se na guzreñge na siitā samjheñ

hamīñ par nahīñ zulm duniyā meñ 'parvīñ'
bahut log yaañ āzmā.e ga.e haiñ

ye tumhāre zulm kī tauhīn hai
shahr meñ chīḳheñ na gūñjeñ der tak

zulm kartā huuñ zulm sahtā huuñ
maiñ kabhī chain se rahā hī nahīñ

zulm agar jaarī rahā to dekhnā phir ek din
ḳhuun uglegī zamīñ ye marhala bhī aa.egā

phir tire zulm kī zad par na kahīñ aa jaa.eñ
aise mazlūm jo aahoñ meñ asar rakhte haiñ

zulm kī kuchh mī.ād nahīñ hai
daad nahīñ fariyād nahīñ hai