Tags-Cruelty

bahut hai zulm ke dast-e-bahāna-jū ke liye
jo chand ahl-e-junūñ tere nām-levā haiñ

zor-āvarī-e-zulm hai is darja ki qātil
kahte haiñ ki hai un kā manāl apnī ye duniyā

nauhagaroñ meñ dīda-e-tar bhī usī kā thā
mujh par ye zulm bār-e-digar bhī usī kā thā

apne liye ab ek hī rāh-e-najāt hai
har zulm ko razā-e-ḳhudā kah liyā karo

tujhe bhī zulm se fursat na mil sakegī kabhī
mirī anā bhī kahāñ sar jhukāne vaalī hai

na jaane kab tumheñ auqāt apnī dikhlā de
ab itnā zulm bhī nādār par nahīñ chaltā

farhād pe is qadar na thā zulm
majnūñ pe na ye ġhazab jafā thī

zulm-o-sitam to had se guzarne lage 'zakī'
amn-o-amāñ kā koī payambar talāsh kar

zulm-e-daurāñ ko atā karnā hai taaza hausla
tiir jo aatā hai siine se lagā lete haiñ ham

furqat meñ hazāroñ zulm sahe ulfat meñ hazāroñ rañj diye
kyā ham ne kiyā kyā tum ne kiyā ye tum ne kiyā vo ham ne kiyā

juz sabr dilā chāra nahīñ ishq-e-butāñ meñ
karte haiñ ye zulm aur tazallum se ziyāda

aur uThā har dam za.īf-o-nā-tavāñ se zulm-o-jaur
daad mazlūmoñ kī de aur le bahisht-e-jāvedāñ

mānā, ho tamāshā.ī tum zulm-e-musalsal ke
lekin ye ḳhamoshī bhī zālim kī himāyat hai

be-hukm yuuñ kisī ko satātā nahīñ falak
mujh par ye zulm aap ke irshād se huā

har aamir tuul denā chāhtā hai
muqarrar zulm kī mī.ād kar ke

zulm kī āñdhiyāñ baḌh ke tūfāñ huiiñ
mast duniyā hai par raat bhar ḳhvāb meñ

dil kis se lagā.ūñ kahīñ dilbar nahīñ miltā
kyā zulm sahūñ koī sitamgar nahīñ miltā

zulm se haath uThānā nahīñ aatā hai agar
kuchh ri.āyat hī karo apne giraftār ke saath

zulm dhāte jo aate turbat par
farsh-e-rah āsmān ho jaate