Tags-Cruelty

shauq se zulm karo shauq se do tum āzār
ye samajh lo mujhe bhī nauhagarī aatī hai

zulm jis ne kiye vo shaḳhs banā hai munsif
zulm par zulm ne mazlūm ko maarā hai bahut

har āstīñ ke ḳhuun ne qātil batā diye
shahr-e-sitam ko zulm kī tardīd chāhiye

kuchh na kahne se bhī chhin jaatā hai ejāz-e-suḳhan
zulm sahne se bhī zālim kī madad hotī hai

zulm sahnā bhī to zālim kī himāyat Thahrā
ḳhāmushī bhī to huī pusht-panāhī kī tarah

zulm TuuTā hī kiye qaa.em rahī shān-e-amal
bijliyāñ girtī rahīñ aur āshiyāñ bantā gayā

kyā kah ke pukāreñge tumheñ log ye socho
'iqbāl' pe tum zulm to din raat karo ho

hijr kā zulm hamārī qismat vasl kī daulat ġhair kā maal
zaḳhm kise aur marham kis ko dard kahāñ hai qarār kahāñ

hijr kā zulm hamārī qismat vasl kī daulat ġhair kā maal
zaḳhm kise aur marham kis ko dard kahāñ hai qarār kahāñ

zulm añdhere kā to sūrat mirī ta.amīr kī hai
raushnī kā sitam ījād kiyā hai maiñ ne

ḳhilqat-e-shahr ke har zulm ke bā-vasf 'farāz'
haa.e vo haath ki apne hī garebān meñ hai

ab is qadar bhī yahāñ zulm ko panāh na do
ye ghar girā hī na de dast-e-ġhā.ebāna koī

shikva-e-zulm-o-jaur kis se kareñ
aadmī aadmī kā dushman hai

abhī ye soch ke maiñ zulm sahtī jaatī huuñ
kabhī to haath tire zulm kā rukegā hī

ye tarz-e-jafā kis sikhā.ī thī sitam-gar
sau zulm hue ek bhī ilzām na aayā

dīvār vo kaale zindāñ kī tasvīr vo zulm insāñ kī
shāhid hai hamāre armāñ kī ham jaan churānā kyā jāneñ

zulm kā zā.iqa to ho ma.alūm
kyuuñ na ik phuul ko masal dekhūñ

phir vahī zulm vahī ḳhalq-e-ḳhudā
ḳhushk pattoñ meñ havā ho jaise

maiñ ik ġhulām huuñ
magar ye zulm kab talak sahūñ

zulm aur jahl par isrār karoge kab tak
aql aur fahm se paikār karoge kab tak