Tags-Cruelty

ḳhūn-e-siyā.ush ik din dikhlā.egā ḳharābī
is zulm kā evaz ai afrāsiyāb hogā

sabr kartī hī rahī be-chārgī
zulm hotā hī rahā mazlūm par

jo mahv-e-zulm-o-sitam thā kal tak vo aaj shāyad badal gayā ho
ye aarzū le ke ham dobāra kisī ke kūche meñ jā rahe haiñ

zulm sah ke bhī maiñ ne hoñT sī liye 'ġhāzī'
ek zarf un kā hai ek zarf merā hai

gul apne ġhunche apne gulsitāñ apnā bahār apnī
gavārā kyuuñ chaman meñ rah ke zulm-e-bāġhbāñ kar leñ

jabr se nasl baḌhe zulm se tan mel kareñ
ye amal ham meñ hai be-ilm parindoñ meñ nahīñ

kab talak aañkh na kholegā zamāne kā zamīr
zulm aur jabr kī ye riit chalegī kab tak

yahī manshūr-e-mohabbat hai ki vo paikar-e-zulm
jis ko nafrat se navāze maiñ use pyaar karūñ

ḳhud hī par zulm Dhāyā jā rahā hai
zamāne se nibhāyā jā rahā hai

jitne bhī yahāñ ke baasī haiñ sab ke sab tum se pyaar kareñ
kyā un se bhī muñh pheroge ye zulm na Dhaao inshā-jī

zulm ke shahr kī sachchā.iyāñ likhne vaalo
chehra chehra yahāñ aḳhbār hai maiñ jāntā huuñ

zulm-o-tashaddud ke shaidā.ī shāyad tujh ko ilm nahīñ
tere bhī sapne TūTeñge mere har ik ḳhvāb ke saath

jitne the zulm sab vo jafā-kār kar chukā
baaqī rahe na charḳh-e-sitamgar ke vāste

din raat mujh pe karte ho kitne hasīn zulm
bilkul mirī pasand ke muḳhtār-e-kār ho

zulm sab ahl-e-zamīñ par haiñ zamīñ vāloñ ke
ham abas dushman-e-aflāk hue jaate haiñ

kahīñ par zulm ke sho.ale kahīñ par ḳhud-parastī hai
chaman kī aabrū ḳhatre meñ hai ye baat sachchī hai

kiye tum ne jo zulm vo maiñ ne sahe mirī āñkhoñ se barsoñ hī ashk bahe
koī ġhamza-o-ishva ab uTh na rahe tumheñ apne hī nāz-o-adā kī qasam

jabr aur zulm kī buniyād ko Dah kar bahno
aao ab himmat-e-mardāna ko hairāñ kar deñ

un hasīnoñ ke zulm sahne ko
merā hī intiḳhāb honā thā

tū dost kasū kā bhī sitamgar na huā thā
auroñ pe hai vo zulm ki mujh par na huā thā