Tags-Cruelty

jānte bhī haiñ ki hai zulm kī bālā-dastī
ye bhī kahte haiñ ki bandoñ kā ḳhudā hotā hai

sāya-e-zulm sar-e-ḳhalq-e-ḳhudā hotā hai
jab bhī parcham shab-e-yaldā kā khulā hotā hai

duniyā meñ 'qatīl' us sā munāfiq nahīñ koī
jo zulm to sahtā hai baġhāvat nahīñ kartā

zulm kī had hai jahāñ ḳhatm vahāñ par vo hai
DhūñD lo us ko yahī us kā patā hai logo

jashn sāvan kā yuuñ baḌh-chaḌh ke manāne vaale
zulm kyā Dhātī hai barsāt tujhe kyā ma.alūm

aap to zulm lagātār kiye jaate haiñ
mujh se tākīd pe tākīd hai fariyād na kar

ham hoñ ki adū us meñ jo zulm kā shākī ho
kartā hī nahīñ tum ko vo pyaar samajh lenā

jaur aur zulm se duniyā meñ ye ḳhūbāñ kā ism
bevafā.ī kā mulaqqab na huā thā so huā

mausam kā zulm sahte haiñ kis ḳhāmushī ke saath
tum pattharoñ se tarz-e-shakebā.ī maañg lo

tum is qadar jo niDar ho ke zulm karte ho
butāñ hamārā tumhārā koī ḳhudā bhī hai

ye nayā zulm hai ġhussa jo unheñ aatā hai
be-gunāhoñ ko bhī māḳhūz vo kar lete haiñ

an-ginat jāgte chehre ga.e miTTī ke tale
ab na.e zulm to ījād nahīñ hone ke

zulm baḌhtā hai roz zālim kā
ḳhatm ye silsila nahīñ hotā

dasht-e-viġha meñ nūr-e-ḳhudā kā zuhūr hai
dasht-e-viġhā meñ nūr-e-ḳhudā kā zuhūr hai

zulm ko tere ye tāqat nahīñ milne vaalī
dekh tujh ko mirī bai.at nahīñ milne vaalī

ye kisī ne zulm bhī hai sunā ki dī phāñsī logoñ ko be-gunāh
vahī kalma-goyoñ kī samt se abhī dil meñ un ke buḳhār hai