Tags-Cruelty

kījiye zulm sazā-vār-e-jafā ham hī haiñ
khīñchiye teġh ki muddat se fidā ham hī haiñ

jaane kis maslahat ke pesh-e-nazar
zulm ab un ke be-panāh nahīñ

zulm hai bāñdhnā ham ko yuuñ had-e-imkāñ meñ
aur ḳhud is kā ba.īd-e-had-e-imkāñ honā

soḳhta tan kī raakh par shāyad
zulm baaqī havā kā hotā hai

ek jagah par Thahrī āñkheñ gahrī socheñ ḳhāmoshī
kab tak ḳhud pe zulm karoge is ko vāpas aanā na.iiñ

zulm par ab hai āsmāñ nādim
sar bhī nīchā hai ik nazar hī nahīñ

zulm kī buniyād par us ne banāyā thā mahal
sabr kī bas ek hī Thokar se vo bhī Dhah gayā

hālāt kā ye ruḳh bhī 'hayāt' aap samajh leñ
kyuuñ zulm ba-andāz-e-karam TuuT rahe haiñ

ham par kitne zulm hue haiñ kaun batā.e duniyā ko
bandūqoñ meñ baaqī hai kyā ek bhī golī bābū-jī

zulm se haiñ barsar-e-paikār āzādī-pasand
un pahāḌoñ meñ jahāñ par koī jharnā hī nahīñ

vo sitam se baaz na ā.eñge yūñhī zulm karte hī jā.eñge
unheñ kyā mare ki jiye koī unheñ apne kaam se kaam hai

mirā dil dād-ḳhvāh-e-zulm aslan ho nahīñ saktā
muravvat muñh ko sī detī hai shikvā ho nahīñ saktā

hai ḳhamoshī zulm-charḳh-e-dev-paikar kā javāb
aadmī hotā to ham dete barābar kā javāb

is dahr ke maqtal meñ bapā zulm hai aisā
mazlūm ko fariyād bhī karne nahīñ dete

zulm kī baat hī kyā zulm kī auqāt hī kyā
zulm bas zulm hai āġhāz se anjām talak

zulm kī qismat-e-nākāra-o-rusvā se kaho
jabr kī hikmat-e-parkār ke iimā se kaho

zulm phir zulm hai baḌhtā hai to miT jaatā hai
ḳhuun phir ḳhuun hai Tapkegā to jam jā.egā

vaqt zālim hai miTā detā hai shaddādoñ ko
aap kā zulm hai kyā aap kī kyā hai auqāt

ġham suuñ tere hai tarahhum kā mahal hāl-e-'valī'
zulm ko chhoḌ sajan sheva-e-ehsān meñ aa

aatā hai bād-e-zulm tumhīñ ko to rahm bhī
apne kiye se dil meñ pashemāñ tumhīñ to ho