Tags-Cruelty

tamām umr ḳhud apne pe zulm dhāte rahe
mohabbatoñ kā asar thā ki koī nashsha thā

uqāb-e-zulm ke panje abhī kahāñ TuuTe
abhī to fāḳhta-e-aman ḳhuun meñ tar hai

ajab tamāshā hai zulm sah kar bhī saare mazlūm mutma.in haiñ
unhīñ kī jānib se qātiloñ kī zamānateñ bhī bahut hui haiñ

zindagī tak sitam to sah le 'soz'
phir to ye zulm baar baar kahāñ

us shoḳh se judā maiñ rahūñ haa.e kab talak
ye zulm ye sitam maiñ sahūñ haa.e kab talak

be-vaj.h zulm sahne kī aadat nahīñ rahī
ab ham ko dushmanoñ kī zarūrat nahīñ rahī

chashm niiñ anjhuvāñ kī bastī kī
zulm terā shumār karne kuuñ

ba-sad hiile bahāne zulm kā dar baaz karte haiñ
vahī jāñ-bāz jin par har ghaḌī ham naaz karte haiñ

chhin jaa.eñ sar-e-rāh jahāñ chādareñ sar kī
us zulm kī nagrī meñ basar kaun karegā

ai merī fitrat-e-tarab-āgīñ ḳhatā-muāf
sharminda huuñ maiñ zulm ke māroñ ke shahr meñ

butoñ kā zulm kisī ne sunā na mahshar meñ
ḳhudā se bhī mirā jhagḌā na infisāl huā

numū to pahle bhī thā iztirāb maiñ ne diyā
phir us ke zulm-o-sitam kā javāb maiñ ne diyā

mustaqil zulm kā mudāvā kar
aarzī mehrbāniyoñ pe na jā

ġhair par zulm mire hote ye kyā hotā hai
dekhiye dekhiye par tiir ḳhatā hotā hai

paikar-e-zulm-o-jafā arsh na hil jaa.e kahīñ
dil dukhānā kisī bekas kā burā hotā hai

aap kā zulm merā sabr-o-shakeb
vāqa.ī be-hisāb haiñ donoñ

hashr meñ allāh se fariyād un ke zulm kī
ai 'rasā' ye baat to shart-e-vafā se duur hai

zulm sahte hue insānoñ ke is maqtal meñ
koī fardā ke tasavvur se kahāñ tak bahle

tū karam kar nahīñ saktā to sitam toḌ ke dekh
maiñ tire zulm ko bhī husn-e-adā de dūñgā

kyā zikr-e-mehr us kī nazar meñ hai dil vo ḳhvār
shāyān-e-jaur-o-zulm dil-ārā nahīñ rahā