Tags-Dard

jazbāt tez-rau haiñ ki chashme ubal paḌe
jab dard tham sakā na to aañsū nikal paḌe

tumhāre shahr ke ādāb bhī ajiib se haiñ
ki dard kam ho magar aah kuchh ziyāda kareñ

thakan ko jaam kareñ aarzū ko baada kareñ
sukūn-e-dil ke liye dard kā i.aada kareñ

abhī to be-niyāzī meñ taḳhātub kī sī ḳhushbū thī
hameñ achchhā lagā thā dard kā dildār ho jaanā

ham ko bulā liyā karo bāteñ kiyā karo
dil meñ tumhāre dard ke tūfān jab uTheñ

lazzat-e-dard kam na ho jaa.e
zaḳhm phir se javān kar diije

dard-mandoñ kī yuuñ hī karte haiñ hamdardī log
ḳhuub hañs hañs ke hameñ aap rulāne aa.e

tumhāre hijr kā ye dard-e-sar to mustaqil Thahrā
mujhe lagtā hai jaañ le ke ye utregā mere sar se

ab to bas bedard lamhe shāmil-e-taqdīr haiñ
vaise merā dil kabhī bhī is qadar ghā.il na thā

kuchh qatra-e-mai uupar uupar phir dard hī dard andar andar
āġhāz-e-mohabbat ḳhuub magar anjām se bachnā mushkil hai

āsār-e-ta.alluq ko jalā detā hai aksar
gumnām kisī dard meñ ġham-ḳhvār kā honā

ye mat kaho ki luTī kā.enāt-e-dard tamām
ki zaḳhm zaḳhm ye saarā jahān baaqī hai

kisī ke sāmne iz.hār-e-dard-e-jāñ na karūñ
udhar udhar kī kahūñ zaḳhm-e-dil ayaañ na karūñ

qissa-e-dard kuuñ anjām nahīñ misl-e-'sirāj'
ġham ke daftar kuuñ lapeT aah ke tūmār kuuñ khol

fanā kā hosh aanā zindagī kā dard-e-sar jaanā
ajal kyā hai ḳhumār-e-bāda-e-hastī utar jaanā

tamām dard ke rishtoñ se vāsta na rahe
hisār-e-jism se niklūñ to be-sadā ho jā.ūñ

ik qayāmat dekh le rohingya par TūTtī
dard ko ik shakl de āzār ko tasvīr kar

talab-e-dard meñ dil had se guzartā kab thā
tum ne pūchhā thā ki aur is ne kahā aur sahī

kabhī hai dard kā chehra kabhī sukūn-e-nazar
ye ehtimām to paiham rahā hai āñkhoñ meñ

Dūbtī nabz kahīñ kā nahīñ chhoḌegī mujhe
dard le Dūbegā vahshat mujhe le Dūbegī