Tags-Dard

dard se kuchh ajab ahvāl thā dil kā kal raat
jaise rone kī kahīñ duur se āvāz aa.e

kahīñ se DhūñD kar laao 'jigar' ko
ilāj-e-dard-e-dil vo jāntā hai

naġhmoñ se jahāñ raushnī-e-dard thī kal tak
sannāTe se hai aaj vo shāḳh-e-shajar ābād

zindagī tū bhī bahut yaad karegī mujh ko
tere hisse ke bhī dukh-dard uThā aayā huuñ

hamārā hāl-e-dil ab tak kisī par khul nahīñ paayā
vufūr-e-dard ko ham zabt kī chādar meñ rakhte haiñ

apne hī ek dard kā chāra na kar sake
saare jahāñ kā dard uThāne se kyā milā

ilaaj is dil-e-dard-āshnā kā kyā kiije
ki tiir ban ke jise harf-e-ġham-gusārī lage

chamak hai us meñ mohabbatāna ye be-qarārī hai āshiqāna
mazā uThā.eñge dard-e-dil kā kabhī na is kī davā kareñge

dard-o-ġham ke qāfile kā zikr hai
ashk kī mauj-e-ravāñ kī baat hai

magar nahīñ thā faqat 'mīr' ḳhvār maiñ bhī thā
ki ahl-e-dard meñ āshufta-kār maiñ bhī thā

phir vahī shaam vahī dard vahī apnā junūñ
jaane kyā yaad thī vo jis ko bhulā.e ga.e ham

ik yahī dard to milā hai hameñ
sher-o-naġhma kī jaan haiñ ham log

fasīl-e-jism pe taanī hai karb kī chādar
ham ahl-e-dard se pūchho ki zindagī kyā hai

ik mire ham-kanār kī mujh se qarīb aa ke raat
ḳhema-e-dard ho ga.ī qurb ke valvale ga.e

shukr-o-sipās kā maza de hī gayā sukūt-e-yār
vasl-o-firāq se alag dard ke hausle ga.e

lazzat-e-dard se āsūda kahāñ dil vaale
haiñ faqat dard kī hasrat meñ karāhe jaate

zabāñ kaTtī hai jis dar par sadā dete duā dete
gadā kahlāte haiñ 'hirmāñ' ham us bedard ke dar ke

tabassum meñ bhī dil ġham kī jhalak pahchān letā hai
ye dard-o-ġham azal se rahne vaale haiñ isī ghar ke

yuuñ dard kī Tīseñ uThtī haiñ yuuñ sabr kā dāmāñ chhuTtā hai
maazī kā fasāna phir dil se Dar Dar ke bhulānā paḌtā hai