Tags-Dard

kyā likhūñ kyā na likhūñ surḳhī-e-afsāna-e-dil
ġham bhī hai dard bhī hasrat bhī hai fariyād bhī hai

tirī be-ruḳhī pe khultā kabhī dard-e-dil kā mazmūñ
na ye harf-e-muḳhtasar gar tire dil pe baar hotā

khaḌī haiñ chāroñ taraf apnī be-gunah sāñseñ
sadā-e-dard ke andar ghirā rahe hai koī

'nadīm' har qadam pe dard-e-be-amāñ kā dar khulā
sukūn is jahān-e-be-misāl meñ nahīñ milā

vaah kyā achchhā taqāzā vaah kyā insāf hai
dard to deñ aap aur tāsīr ham paidā kareñ

dil agar dard-āshnā na huā
nañg-e-hastī huā huā na huā

mahshar bhī koī dard hai jo uTh ke rah gayā
shikva bhī koī ġham hai jo dil meñ nihāñ rahā

na dikhā.iyo hijr kā dard-o-alam tujhe detā huuñ charḳh-e-ḳhudā kī qasam
mire yaar ko mujh se na kiijo judā tujhe sarvar-e-har-dūsrā kī qasam

tire uThte hī pahlū meñ dard uThā tire jaate hī dam ye adam ko chalā
mujhe chhoḌ ke aah tū ghar ko na jā tujhe apne hī funduq-e-pā kī qasam

un muġhbachoñ ke kūche hī se maiñ kyā salām
kyā mujh ko tauf-e-ka.aba se meñ riñd-e-dard-nosh

ibtidā meñ dard-e-furqat maut hai anjām-e-ishq
ahl-e-dil ko nā-muvāfiq hai havā-e-bām-e-ishq

ik shikasta saaz hai aur ik sadā-e-dard-e-dil
ham haiñ tum ho bekasī hai ġham hai aur tanhā.iyāñ

kis taraf se aa rahī haiñ dard kī purvā.iyāñ
aag sī dene lagī haiñ bhīgtī añgnā.iyāñ

mat pūchh harf-e-dard kī tafsīr kuchh bhī ho
vo ḳhvāb lā-javāb thā ta.abīr kuchh bhī ho

dukh dard yahāñ aa.eñ to vāpas nahīñ jaate
ye dil koī āseb-zada bāra-darī hai

be-sadā gumbad-e-ehsās huā mohr-ba-lab
phuul ke dard kā qissa koī kāñTā jaane

kyuuñ ek ḳhvāb ko āñkhoñ meñ le ke phirtā hai
kyuuñ ek dard kā ehsās kū-ba-kū hai use

huī hai aaj tabī.at suḳhan pe phir maa.il
so mauj-e-dard ko dil meñ bahāl ham ne kiyā

hazār dard ke mausam guzar ga.e lekin
kabhī darāz na dast-e-savāl ham ne kiyā

farsh-e-rah ban ke bikhar jaatī hai
bū-e-gul dard-e-sabā jāntī hai