Tags-Dard

na.ī havā hai kareñ mish.al-e-havas raushan
ki sham-e-dard charāġh-e-vafā hai kitnī der

hazrat-e-dil ye ishq hai dard se kasmasā.e kyuuñ
maut abhī se aa.e kyuuñ jaan abhī se jaa.e kyuuñ

raah meñ hai dard kā koh-e-girāñ
kohkan bhī maiñ nahīñ maiñ kyā karūñ

un kī ḳhātir se kabhī ham muskurā uTThe to kyā
muskurā lene se dil kā dard kam hotā nahīñ

ḳhudā shāhid hai dil par choT sī ik lag ga.ī mere
bahānā dard-e-sar kā kar ke jab us ne jabīñ pakḌī

tumhārā hī karam hai mire dard
jo merā sher puḳhta lag rahā hai

zindagī tirī ḳhātir tere dard-mandoñ ne
ik jahān kī tohmat apne sar uThā.ī hai

dil jahāñ bhī Duubā hai un kī yaad aa.ī hai
haa.e kyā sukūñ-parvar dard-e-āshnā.ī hai

zaḳhm lagte hī rahe rūh-o-badan par itne
nahīñ ma.alūm ki ab dard kidhar rahtā hai

tire dard se jis ko nisbat nahīñ hai
vo rāhat musībat hai rāhat nahīñ hai

ik dard ho bas aaTh pahar dil meñ ki jis ko
taḳhfīf davā se ho na taskīn duā se

jo rāz-e-do-jahāñ hai amānat hai husn kī
hāsil mujhe vo azmat-e-dard-e-jigar hai aaj

sāz-e-alam bhī soz-e-tarab-ḳhez hai 'hamīd'
har ik navā-e-dard mirī naġhma-gar hai aaj

ham-nashīnoñ meñ hamārā ham-navā koī nahīñ
āshnā to haiñ bahut dard-āshnā koī nahīñ

ḳhatm hote hue aañsū hoñ ki thamtā huā dard
ham se ab aur sazā.eñ nahīñ dekhī jātīñ

ik dard hai apne dil meñ bhī ham chup haiñ duniyā nā-vāqif
auroñ kī tarah dohrā dohrā kar us ko fasānā kaun kare

dil kī rag rag meñ samā kar 'bedam'
dard to jaan huā jaatā hai

''har ghaḌī dard ke paivand lage jaate haiñ''
ye mujhe mere gunāhoñ kā asar lagtā hai

har taraf dard hai tārīkī udāsī hai bahut
kis qadar saḳht ye sāñsoñ kā safar lagtā hai

kaun dasht-e-karb ke āzār kā aadī huā
kaun jā paayā hai bahr-e-dard kī maujoñ ke paar