Tags-Dard

vo mazā rakhte haiñ kuchh taaza fasāne apne
bhūlte jaate haiñ sab dard purāne apne

pis ga.e dard kī chakkī kī siloñ meñ mire ḳhvāb
aañkh meñ niiñd nahīñ jism bhī TuuTā huā hai

shauq meñ us ke mazā dard meñ us ke lazzat
nāseho us se nahīñ koī mafar kī sūrat

bas yūñhī dard kā abr sheroñ kī bārish meñ Dhaltā gayā
vārisān-e-suḳhan! koī tamġha nahīñ hai kamānā mujhe

jī bahalne ko log sunte haiñ
dard-e-dil dāstān hai goyā

har ek lamha guzartā hai hādse kī tarah
bas ek dard-e-musalsal hai zindagī merī

hujūm-e-dard meñ gum ho ga.ī mirī āvāz
zamāne vāloñ ne rūdād kab sunī merī

tumheñ yaad hai mire sāthiyo ki bichhaḌ ga.e the vahīñ se ham
tumheñ dard-e-dil kī davā milī mujhe dard-e-dil kī duā milī

ka.ī manziloñ se guzar ga.e to hameñ ye rāh-e-vafā milī
kahīñ dil milā kahīñ dard-e-dil kahīñ dard-e-dil kī davā milī

jigar meñ dard lab par nāla-e-vahshat asar honā
ayaañ kartā hai ik rashk-e-parī kā dil meñ ghar honā

ab qalb-e-muztarib meñ nahīñ tāb-e-dard-e-hijr
ab aa bhī jaao dard kā darmāñ liye hue

umr dukh dard meñ kaTī apnī
is liye ġham se pyaar kartā huuñ

qafas-e-rañg meñ din raat vahī pyaas kā dard
āgahī bhī mujhe jiine kī sazā detī hai

usī dard-āshnā dil kī taraf-dārī meñ rahte haiñ
ham apne-āp meñ gum apnī ġham-ḳhvārī meñ rahte haiñ

tū nahīñ to terā dard-e-jāñ-fazā mil jā.egā
zinda rahne kā koī to aasrā mil jā.egā

tarāna-e-ġham-e-pinhāñ hai har ḳhushī apnī
ki ek dard-e-musalsal hai zindagī apnī

is bharī duniyā meñ ab to koī bhī apnā nahīñ
jaise tum har dard kā rishta uThā kar le ga.e

kyā kaheñ mahfil se terī kyā uThā kar le ga.e
ham matā-e-dard ko tanhā uThā kar le ga.e

karb se TuuTā nahīñ maiñ dard se martā nahīñ
mujh pe taarī be-hisī hai be-hisī kī baat kar

terī palkoñ pe koī ḳhvāb laraztā hogā
mere gītoñ meñ koī dard javāñ hai ab ke