Tags-Dard

ab mirā dard mirī jaan huā jaatā hai
ai mire chāragaro ab mujhe achchhā na karo

aa.ī tanhā na ḳhāna-e-dil meñ
dard ko apne saath laa.ī choT

dard-e-dil kī unheñ ḳhabar kyā ho
jāntā kaun hai parā.ī choT

kis dard kī āvāz se chillā.ī hai bulbul
ham paas to us murġh-e-hazīñ ke na raheñge

ye aarzū hai kisī din to apne dil kā dard
kareñ ham aan ke tum se bayān koThe par

jab se matā-e-dard milī mujh ko ai 'zafar'
qad mere sāmne mire yāroñ ke ghaT ga.e

baat is dil ke dard kī yaaro
guftugū meñ nidān paḌtī hai

kuchh dard ke maare haiñ kuchh naaz ke haiñ paale
kuchh log haiñ ham jaise kuchh log haiñ tum jaise

vo dard-e-darūñ jism meñ yuuñ phail gayā hai
paḌtā hai jahāñ haath samajhtā huuñ yahīñ hai

na vo jhāñknā hai galī galī na vo tāknā hai kalī kalī
na kasak hai hijr ke dard meñ na damak hai shauq-e-visāl meñ

un ko na pukāro ġham-e-daurāñ ke laqab se
jo dard kisī naam se mansūb rahe haiñ

us kī yādoñ ke parindoñ ko uḌā kar 'az.har'
dil se ab dard kā ik ek shajar kāTte haiñ

sauñp kar us ko tire dard ke saare mausam
phir usī lamhe ko ham zindagī-bhar kāTte haiñ

ye dard-e-dil to hāsil-e-umr-darāz hai
maiñ is ko apnī zaat se kyuuñ kar judā karūñ

hijr ke dard ko baḌhne de ki hai muzhda-e-vasl
vahī ghaTtā hai jahāñ meñ jo sivā hotā hai

dil ke hote bhī kahīñ dard judā hotā hai
ik faqat maut ke aa jaane se kyā hotā hai

dard kā darmāñ suḳhan-hā-e-shagufta bhī nahīñ
be-asar hai sab tirī jādū-bayānī aur bas

kitne qarnoñ ne tarāshā us but-e-bedard ko
kitnī nasloñ kā lahū us jism meñ hal ho gayā

samo ke āñkhoñ meñ umDī ghaTā.eñ ai 'āzād'
vo ek dard kā sahrā banā gayā mujh ko

kabhī milī jo tire dard kī navā mujh ko
ḳhamoshiyoñ ne mujhī se kiyā judā mujh ko