Tags-Dard

zindagānī dard-e-sar hai yaar bin
kui hamāre sar kuuñ aa kar jhaaḌ de

phir aaj sahme hue lamhe yaad aane lage
hisār-e-dard meñ 'ḳhurshīd' ghir gayā huuñ maiñ

mere har dard se paivand bane
ārzūoñ kī ik ridā aisī

ye bhī koī karāhne kī hai baat
kuchh 'jigar' dard baḌh gayā hogā

dard darmāñ se kam to kyā hogā
yahī hogā ki kuchh sivā hogā

dard ke sahn ko dushman nahīñ jaanā ham ne
is meñ dilkash na.ī duniyā kī nishānī dekhī

saaz o sadā ke shor meñ gum ho gayā 'jamīl'
kis kis ke dil kā dard thā shahnā.iyoñ meñ bhī

Duubā huā huuñ dard kī gahrā.iyoñ meñ bhī
maiñ ḳhanda-zan huuñ khokhlī dānā.iyoñ meñ bhī

shiddat-e-dard hī hotī kahīñ ġhārat-gar-e-hosh
baḳht itnā to na barham-zan-e-sāmāñ hotā

'rishī' huā to hai apne bhī haal kā pursāñ
vo shaḳhs ham jise dard-āshnā kaheñ apnā

jo jalā kare to jalā kare jo bujhā rahe to bujhā rahe
kisī aur ko na sunā.ī de vahī dard huuñ maiñ charāġh kā

mire ashk se mire dard se nahīñ vāsta hai jahān ko
na to ashk huuñ kisī 'mīr' kā na hī dard huuñ kisī 'dāġh' kā

hādsāt-e-dahr meñ vābasta-e-arbāb-e-dard
lī jahāñ karvaT kisī ne inqalāb aa hī gayā

dard ālūda-e-darmāñ thā 'ravish'
dard ko dard banāyā ham ne

dast-bar-dil ho uThātā huuñ ajab lazzat-e-dard
yaad kar hijr meñ vo haath baḌhāne kā mazā

kyā tire mai-kash-e-ulfat kā ye kaifiyyat hai
dard-e-dil kar ke bayāñ rone rulāne kā mazā

dard us ahd kī mīrās hai Darnā kaisā
dard ko oḌh liyā karte haiñ chādar kī tarah

dard ko shola-e-ḳhumār kiyā
shīsha-e-ġham ko sharmsār kiyā

dard iksīr ke sivā kyā hai
zaḳhm-e-dil ke binā mazā kyā hai

jalāte ho mirā ghar raakh merī phir uḌāte ho
havā meñ bhar ke merā dard kyuuñ sab ko dikhāte ho