Tags-Dard

dard kā chaḌhtā samundar jism kā kachchā makāñ
aur un ke darmiyāñ āvāz kā sahrā bhī hai

kaise chhuḌā.ūñ kaise likhūñ sharh-e-dard-e-nau
har ek lafz zīnat-e-zindāñ hai in dinoñ

jī chāhtā hai rū-e-zamīñ par bikher duuñ
jo dard merī ruuh meñ pinhāñ hai in dinoñ

dard kā dard se darmāñ karte
yuuñ ilāj-e-ġham-e-jānāñ karte

niiñd to dard ke bistar pe bhī aa saktī hai
un kī āġhosh meñ sar ho ye zarūrī to nahīñ

jis ko dohrātā rahā barsoñ 'munīr'
us ke apne dard kā qissa na thā

dil ko vīrāñ kar gayā zehnī shu.ūr
dard thā par dard kā yaarā na thā

dard-e-dil ne lī na thī karvaT abhī
un ke māthe pe pasīnā aa gayā

tum dard kī lazzat kyā jaano kab tum ne chakhe haiñ zahr-e-subū
ham apne vajūd ke shāhid haiñ sañgsār hue shamshīr hue

zindagī mere sañvarne ke liye
dard pahnā.e ga.ī hai mujh ko

dam koī dam kā hai mehmāñ alvidā.a
dard-o-ġham mere dil-o-jāñ alvidā.a

ek hī tarah se jo sochte haiñ ham donoñ
ek se dard haiñ ya.anī ki tumhāre mere

dil ke sahrā meñ zaḳhm khilte haiñ
dard kaisā jagā rahī hai raat

kaheñ kyā tum suuñ be-dard logo kisī se jī kā maram na paayā
kabhī na būjhī yathā hamārī birah niiñ kyā ab hameñ satāyā

rabt-e-bātin kyā suno tafsīl us ijmāl kī
ham sarāpā dard hoñ aur tum sarāpā dil bano

zamāna lab pe ye añgusht rakh ke kahtā hai
ki dard-e-dil na kaho aur kaho to Darte hue

dard-e-dil kyūñ-ki kahūñ maiñ us se
har taraf log ghire baiThe haiñ

siine meñ ik dard bhī rahtā hai bedār
āñkhoñ meñ kuchh niiñd bhī aa.ī rahtī hai

hijr kā chāñd dard kī naddī
yahī sūrat hai apnī duniyā kī

ḳhudā vo dard-e-mohabbat har ek ko baḳhshe
ki jis meñ ruuh kī taskīn bhī paa.ī jaatī hai