Tags-Dard

aaj khulne hī ko thā dard-e-mohabbat kā bharam
vo to kahiye ki achānak hī tirī yaad aa.ī

har-sū marg-āsār ḳhamoshī chhā.ī hai
dard ke maaro shorish-e-hashr ījād karo

tū sukūn-o-sabr miTā.e jā ġham-e-ishq mujh ko rulā.e jā
ho taḌap taḌap ke sahar mujhe yahī dard-e-dil tirā kaam hai

na qarār aa.e kisī tarah mire dard-e-dil tū taraqqī kar
shab-e-ġham taḌapte hī ho sahar shab-e-ġham taḌapne se kaam hai

mujhe dard tū ne atā kiyā mire mehrbāñ tirā shukriya
banā dard-e-dil tirā zindagī tire dard-e-dil se hī kaam hai

ahd jaise bhī bañdhe the tere mere darmiyāñ
dard ke rishte juḌe the tere mere darmiyāñ

kaun hai kis se karūñ dard-e-dil apnā iz.hār
chāhtā huuñ ki suno tum to kahāñ sunte ho

bedard sunñī ho to chal kahtā hai kyā achchhī ġhazal
āshiq tirā rusvā tirā shā.ir tirā 'inshā' tirā

dard-e-sar hai ḳhumār se mujh ko
jald le kar sharāb aa saaqī

aaj kuchh yuuñ shab-e-tanhā.ī kā afsāna chale
raushnī sham.a se dil dard se begāna chale

TūTne paa.e na ye silsila-e-gardish-e-dard
dast-dar-dast chhalaktā huā paimāna chale

kuchh na go aañkh meñ be-dard nigāhoñ ke sivā
guftugū sāqī-e-daurāñ se harīfāna chale

dard Thahre to zarā dil se koī baat kareñ
muntazir haiñ ki ham apne se mulāqāt kareñ

ik vaqt thā ki dil ko sukūñ kī talāsh thī
aur ab ye aarzū hai ki dard-e-nihāñ rahe

ek sāhil huuñ to kyā merā koī dard nahīñ
sirf kashtī pe hī kyuuñ sab kī nazar jaatī hai

phir sar-e-shāḳh-e-ārzū khil ke mahak uThī kalī
dard kī fasl ho chukī daaġh ke din guzar ga.e

diyā hai dard to rañg-e-qubūl de aisā
jo ashk aañkh se Tapke vo dāstāñ ho jaa.e

jam gayā dil meñ lahū suukh ga.e āñkhoñ meñ ashk
tham gayā dard-e-jigar rañg-e-sahar se pahle

vīrān jazīroñ kī tarah ḳhushk haiñ āñkheñ
bekār hai ai dard tirī nāla-zanī bhī

justujū nañg-e-ārzū niklī
dard rusvā huā davā ke liye