Tags-Dard

dard ke saare hī qissoñ kī yād-dahānī kar lenā
hijr kī raat bahut lambī hai ek kahānī kam na paḌe

kyā pūchhte ho dard ke māroñ kī zindagī
ya.anī falak ke Dūbte tāroñ kī zindagī

ik yaad rah ga.ī hai magar vo bhī kam nahīñ
ik dard rah gayā hai so rakhnā sambhāl kar

sub.h-dam ham se tū na kar takrār
hai hameñ pahle dard-e-sar vaa.iz

ban gayā hai jism guzre qāfiloñ kī gard sā
kitnā vīrāñ kar gayā mujh ko mirā hamdard sā

sadma jigar pe pahuñche to ho dil meñ kyuuñ na dard
kyā farq kuchh judā nahīñ haiñ dil jigar mile

sharīk-e-dard ban kar apne begāne nahīñ aate
mai-e-ishrat jo piite haiñ vo ġham khāne nahīñ aate

dard ban kar tirī judā.ī kā
dil meñ uThtī hai huuk jaisī chiiz

chhūT kar jā.ūñ kahāñ maiñ ki huuñ ḳhud meñ hī asiir
jaane kis dard kā aaseb mire sar hai abhī

dard-e-furqat hī mirī maut kā sāmāñ hai 'qamar'
dil kisī taur bahaltā nahīñ bahlāne par

muḳhtasar baat thii, phailī kyuuñ sabā kī mānind
dard-mandoñ kā fasāna thaa, uchhālā kis ne

rakhtā huuñ is liye dil-e-sozāñ o chashm-e-tar
jiyūñ sham.a dard-e-dāġh se ishq-āfrīda huuñ

dard kī ḳhushbū se ye mahkā rahā
jab kabhī kamre meñ maiñ tanhā rahā

vahī dard-e-dil kī hai dāstāñ jo hamesha dil meñ rahe nihāñ
kare ek baar koī bayāñ to zamāne-bhar ko rulā sake

ve din ga.e ki dil meñ rahtā thā dard apne
ab dil nahīñ sarāpā ik dard ho gayā hai

ahl-e-hunar ke dil meñ dhaḌakte haiñ sab ke dil
saare jahāñ kā dard hamāre jigar meñ hai

chamak hai dard hai kauñdan paḌī hai huuk uThtī hai
mire pahlū meñ kyuuñ yaaro ye dil hai yā ki phoḌā hai

jab se kisī se dard kā rishta nahīñ rahā
jiinā hamārā tab se hī jiinā nahīñ rahā

chāhat nafrat duniyā uqbā ye ḳhair ḳharābī dard davā
har dhandā jī kā jokhim hai har saudā jaan kā ghāTā hai

har ik darāḌ badan kī numāyāñ ho ga.ī hai
kahānī dard kī dīvār par likhī huī hai