Tags-Dard

kyā paas bulbul-e-ḳhizāñ ne na kuchh
gul-o-barg be-dard phailā ga.ī

pahlū meñ dil hai dard-e-mohabbat liye hue
baiThā huuñ kā.enāt kī daulat liye hue

saath ġhurbat meñ koī ġhair na apnā niklā
maiñ faqat dard ke sahrā meñ akelā niklā

aan ke is bīmār ko dekhe tujh ko bhī taufīq huī
lab par us ke naam thā terā jab bhī dard shadīd huā

kaun se dukh ko palle bāñdheñ kis ġham ko tahrīr kareñ
yaañ to dard sivā hotā hai aur bhī arz-e-hāl ke ba.ad

rāt-din dard ke āġhosh meñ jaltī sāñseñ
ab lahū jism kā tezāb huā jaatā hai

purse ko aa.e aur mirā dard bhaag jaa.e
phir zaḳhm de shadīd sitamgar se kyā ba.iid

jaagā na ek shaḳhs bhī merī nava-e-dard se
naale ga.e haiñ be-asar raat bahut guzar ga.ī

kuchh ham ko imtiyāz nahīñ saaf o durd kā
ai sāqiyān-e-bazm bayārīd harche hast

gudāz-e-qalb bhī hotā hai kuchh unhīñ ko nasīb
jo dard-mand haiñ un ke hī dil pighalte haiñ

dukh-dard saarī duniyā ke aa.eñ jo sāmne
in sab kā hai bas ek hī chāra tumhārī yaad

kyā koī dard dil ke muqābil nahīñ rahā
yā ek dil bhī dard ke qābil nahīñ rahā

nāzuk laboñ kī pañkhuḌiyāñ thartharā thartharā ga.iiñ
tez-rau bād-e-dard thī chehra thā gard gard sā

kis chāñdnī kī aañkh se bikhrī shafaq kī ret meñ
motī sā Dhal ke gir paḌā shaam ke dil kā dard sā

kahte hue saaqī se hayā aatī hai varna
hai yuuñ ki mujhe durd-e-tah-e-jām bahut hai

rah-e-hayāt meñ āsā.ishoñ ko Thukrā kar
tumhāre dard ko maiñ ne sadā qubūl kiyā

vo tāb-e-dard vo saudā-e-intizār kahāñ
unhī ke saath ga.ī tāqat-e-shakebā.ī

is ahd-e-intishār meñ kyā ittifāq hai
dard-o-alam ye rañj-o-malāl ek jā mile

ġharqāb ho na jaa.e kahīñ zabt kā jahāñ
phir aaj dard-e-dil kā hai dariyā chaḌhā huā

phir to sab hamdard bahut afsos ke saath ye kahte the
ḳhud hī laḌe bhañvar se kyuuñ zahmat kī ham jo baiThe the