Tags-Dard

maazī kī tanāboñ se lage dard ke ḳheme
kyā jāniye kyuuñ dīda-e-imkāñ nahīñ hote

na koī dard-āshnā na hamdam na koī soz-e-darūñ kā mahram
hameñ yahāñ ajnabī haiñ jaane ki saarī duniyā na.ī na.ī hai

qabā-e-dard jab se zeb-e-tan hai
ḳhushī ko apne andar dekhte haiñ

bahār aa.ī hai is baar kuchh likheñ ham bhī
sikhāo ham ko bhī is dard ko shajar karnā

jo ab ke dard uThā dil meñ āḳhirī hogā
jo ho sake to use merā chāragar karnā

laboñ tak aayā zabāñ se magar kahā na gayā
fasāna dard kā al-muḳhtasar kahā na gayā

dard kī mauj ubhartī hai tire naam ke saath
dūriyāñ laakh sahī pyaar kī qurbat hai baḌī

ziist kī āgahī kā hāsil hai
dard hī shā.irī kā hāsil hai

minnat-e-chāra-sāz kaun kare
dard jab jāñ-navāz ho jaa.e

kaun māregā dūsrā patthar
koī sūrat ki dard baT jaa.e

dard-o-ġham-o-andoh-o-alam nāla-e-jāñ-kāh
haiñ dushman-e-jānī sabhī yak zaat hamāre

tum apnī yaad se kah do na jaa.e chhoḌ ke dil
ki dard-e-hijr na rakh de kahīñ maroḌ ke dil

kis dil se hai ḳhudā.ī meñ ījād dard-e-ishq
roz-e-azal jo mūjid-e-shevan thā kaun thā

baiTh jaatā hai jahāñ dard thakā-hārā sā
ḳhvāb bhī us se savālāt nahīñ kar paate

'ābrū' kyuuñ na ho rahe ḳhāmosh
dard kahne kī yaañ manāhī hai

simaTtī phailtī tanhā.ī sote jāgte dard
vo apne aur mire darmiyān chhoḌ gayā

vaqt har zaḳhm kā marham to nahīñ ban saktā
dard kuchh hote haiñ tā-umr rulāne vaale

itnā karam ki azm rahe hausla rahe
is dil ke saath dard kā rishta sadā rahe

hamāre daur kī tārīkiyāñ miTāne ko
sahāb-e-dard se ḳhushiyoñ kā chāñd ubhrā hai

jo dard kā hāmil hai vo zauq meñ kāmil hai
behis ko nahīñ hotā īqān mohabbat kā