Tags-Dard

aish-o-ishrat ko na de tū raah dil meñ ai 'hasan'
dard-o-ġham hī se kisī ke is ko mālā-māl kar

har gaam 'nushūr' ābla-pā.ī kā hai aalam
kuchh duur hai ye qāfila-e-dard ravāñ aur

ilaaj kis kā karegā ye pūchhtā kyā hai
batā.eñ kyā tujhe hai dard chārasāz kahāñ

nashāt-e-dahr abhī dard se badal jaa.e
milā hai zabt-e-mohabbat kā iḳhtiyār mujhe

vahī dard hai vahī bebasī tire gaañv meñ mire shahr meñ
be-ġhamoñ kī bhiiḌ meñ aadmī tire gaañv meñ mire shahr meñ

ik dard aa ke mujh meñ achānak Thahar gayā
royā vo jab gale se lagāte hue mujhe

aalam kī mushkilāt ko āsāñ banā.iye
ab dard-e-dil ko māya-e-īmāñ banā.iye

yā ārzū-e-lutf-o-karam tark kījiye
yā hāl-e-dard qābil-e-darmāñ banā.iye

nava-e-dard mirī kahkashāñ meñ Duub ga.ī
vo chāñd tāroñ kī sail-e-ravāñ meñ Duub ga.ī

aaj hī mahfil sard paḌī hai aaj hī dard farāvāñ hai
koī to dil kī bāteñ chheḌo yaaro mahfil-e-yārāñ hai

dard uTThā thā mire pahlū meñ
āḳhir-e-kār jigar tak pahuñchā

dard kī raat guzartī hai magar āhista
vasl kī dhuup nikhartī hai magar āhista

apnā zabt nā TuuTe is ke ḳhātir ham
dīvāroñ ko dard sunāte rahte haiñ

ham ahl-e-dard pukāre ga.e sahīfoñ meñ
ham ahl-e-ishq utāre ga.e kitāb ke saath

qāfila dard kā Thahregā kahāñ ham-safaro
koī manzil hai na bastī na kahīñ saayā hai

tum dil meñ chhupāo na kaho aag lagegī
ash.ār ke dāman meñ kahāñ dard chhupeñge

dard āvāz rafta rafta bane
āh-e-shab nāla-e-sahar ho jaa.e

pahlū se uThe dard ne āñkhoñ meñ jagah lī
afsos tujhe niiñd yahāñ kaun sī jā deñ

saañs kā apnī rag-e-jāñ se guzar hone tak
dard hotā hai mujhe shab ke sahar hone tak

apne hī ḳhuuñ meñ nahātā hai har ik saañs ke saath
dil mirā dil thā kisī dard kā ghar hone tak