Tags-Dard

tū hai zāhir parast ai duniyā
mahke gesū kā dard kyā jaane

dāstān-e-murġh ik dard-e-nihāñ sābit huī
ye pareshānī nashāt-e-dushmanāñ sābit huī

duniyā laraz ga.ī dil-e-īzā-pasand kī
nā-āshnā-e-dard jo dard-āshnā huā

sunā āshob-e-vahshat aur fishār-e-zāt kā naġhma
'nadīm' ab kārvān-e-dard le aayā kahāñ mujh ko

kho gayā dard hangāma-e-shahr meñ luT rahī hai dukān-e-matā-e-nazar
ab bhī taufīq agar hai to ahl-e-junūñ baḌh ke le lo use jaan o tan bech kar

maiñ ne dāman jhaaḌ diyā
itnā dard sahegā kaun

ik lafz na aayā hoñToñ par
lamhe be-dard to aa.e the

fasīl-e-dard se yādoñ kī dhuup Dhaltī huī
bikharte TūTte rañgoñ kā ḳhvāb chāroñ taraf

dil nahīñ vo siine meñ ek sañg-e-ḳhārā hai
ho na jis meñ poshīda āh-e-dard-mandāna

sunā hai dard se 'ahyā' qalam meñ zor miltā hai
so maiñ ne bhī duā kar lī mujhe bhī pyaar ho jaa.e

ye āñkheñ mehrbāñ thiiñ
ham-nafas hamdard apnī thiiñ

dard ke silsile
phuul afsurda kaliyāñ niDhāl

hotā hai 'shu.ūr' dard dil meñ
phoḌā ye dikhā.iye kisī ko

haal na pūchheñ dard na bāñTeñ us jañgal ke log
apnā apnā sukh hai sab kā apnā apnā sog

ik ḳhushī aise muskurā.ī thī
dard jaise bichhaḌne vaale the

pyaas bujhāne aate haiñ dukh dard parinde raat ga.e
ḳhvāb kā chashma phūTā thā āñkhoñ meñ ab tak jaarī hai

Duub kar dard ke dariyā meñ ai mere hamdam
tujh ko kaise maiñ batā.ūñ ki maiñ ne kyā paayā

dard zanjīr kī sūrat hai diloñ meñ maujūd
is se pahle to kabhī us ke ye pairā.e na the

kisī kā dard ho dil be-qarār apnā hai
havā kahīñ kī ho siina figār apnā hai

dard-e-dil dard-e-jigar kī dāstāñ likkhī bahut
nān-e-ḳhushk-o-āb-e-kam ko zindagī likkho kabhī