Tags-Dard

yaar aayā hai jab muālij ho
dard-e-furqat meñ nahiñ rahā bīmār

har zaḳhm-e-kohnā vaqt ke marham ne bhar diyā
vo dard bhī miTā jo ḳhushī kī asaas thā

andoh-o-dard-o-ġham ne kiyā azm jab idhar
ham ko adam se qāfila-sālār kar chale

dard kā rishta bhī hai tujh se bahut
aur phir ye dard kā rishta bhī kiyā

be-nām dayāroñ se ham log bhī ho aa.e
kuchh dard the chun laa.e kuchh ashk the ro aa.e

ham ne jo kiyā mahsūs kahā jo dard milā hañs hañs ke sahā
bhūlegā na mustaqbil ham ko nālāñ hai jo ham se haal to kyā

sub.h ke dard ko rātoñ kī jalan ko bhūleñ
kis ke ghar jaa.eñ ki is va.ada-shikan ko bhūleñ

judā.iyoñ ke zaḳhm dard-e-zindagī ne bhar diye
tujhe bhī niiñd aa ga.ī mujhe bhī sabr aa gayā

har sū udaas chehre haiñ itne ki ab 'nasīm'
kis ko dayār-e-dard kā bāshinda kah sakeñ

manziloñ se begāna aaj bhī safar merā
raat be-sahar merī dard be-asar merā

āvāzoñ ke añg añg meñ dard ke nashtar chubhne lage
pyāsī āñkhoñ ke sahrā meñ ret kā jhakkaḌ chalne lagā

zaḳhm bhī taaza hai aur dil bhī nahīñ mānūs-e-dard
rafta rafta yūñhī aadat sabr kī ho jā.egī

marg-e-be-hañgām kahte haiñ jise aaj ahl-e-dard
kal yahī sūrat badal kar zindagī ho jā.egī

kuchh aise dard bhī haiñ zindagī kī rāhoñ meñ
jahāñ hijāb-e-tabassum bhī kaam aa na sake

dil kī rāhoñ meñ ba-har-sūrat rahī ik raushnī
chāñd tere dard kā baḌhtā bhī thā ghaTtā bhī thā

ik azāb-e-jān thī us kī tunak-ḳhūī magar
zā.iqa us dard kā mīThā bhī thā tīkhā bhī thā

dard-e-ulfat se āshnā kar ke
mujh se āñkheñ churā gayā koī

dil kī duniyā meñ aa gayā koī
dard ban kar samā gayā koī

merā hissa mujhe ḳhāmoshī se de detā hai
dard ke aage hathelī kabhī phailā.ī nahīñ

kyā ḳhabar thī ye mohabbat kā natīja hogā
rāt-din dard-e-judā.ī meñ taḌapnā hogā