Tags-Dard

sisakte phūloñ kā koī bhī dard-mañd nahīñ
mahak se pyaar hai ma.asūmiyat pasand nahīñ

chāragarī bīmāri-e-dil kī rasm-e-shahr-e-husn nahīñ
varna dilbar-e-nādāñ bhī is dard kā chāra jaane hai

sunā hai haal batāne se dard ghaTtā hai
so ek roz charāġhoñ ne baat kī mire saath

kis liye kam nahīñ hai dard-e-firāq
ab to vo dhyān se utar bhī ga.e

dard us se bayāñ karūñ kaise
jaise māhī-be-āb kī sūrat

tumhāre dard-mandoñ kī ḳhabar le
ġham-e-daurāñ ko aisī kyā paḌī hai

na aa.ī raas hameñ aap kī masīhā.ī
ki dard uThtā hai ab bhī jigar meñ shaam Dhale

simTī to aur phail ga.ī dil meñ mauj-e-dard
phailā to aur dāman-e-ġham muḳhtasar huā

ḳhudāyā dard ko de aur shiddat
ki maiñ ab haar jaanā chāhtā huuñ

muḳhtasar baat thii, phailī kyuuñ sabā kī mānind
dard-mandoñ kā fasāna thaa, uchhālā kis ne

is dard-e-dil kā pūchhiye kis se ilaaj jā
apnī sī kar chuke pa na koī davā lagī

mañjdhār meñ huuñ paas kinārā bhī nahīñ
bas meñ mire is dard kā chāra bhī nahīñ

koī suntā hī nahīñ kis ko sunāne lag jaa.eñ
dard agar uTThe to kyā shor machāne lag jaa.eñ

nihāl-e-dard ye din tujh pe kyuuñ utartā nahīñ
ye nīl-kanTh kahīñ tujh se bad-gumāñ hī na ho

sabab maraz kā hai tark-e-ādat yahāñ yahāñ haiñ dard-o-alam kī ḳhūgar
yahī samajhnā davā hamārī ki chāra-sāzo davā na karnā

ham apne raftagāñ ko yaad rakhnā chāhte haiñ
diloñ ko dard se ābād rakhnā chāhte haiñ

jitne haiñ ahl-e-dard haiñ hamdard
dil vo patthar hai jo gudāz nahīñ

dard kā zinda rahnā pyaas kā mo.ajaza hai
dīvāne hī ye ban-bās kamāte haiñ

dil meñ raushan hai tirā dard zamāne se nihāñ
kyā sadaf ne bhī dikhāyā kabhī gauhar apnā

ġham kī tasvīr ban gayā huuñ maiñ
ḳhātir-e-dard-āshnā huuñ maiñ