Tags-Dard

nāvak-e-nāz se mushkil hai bachānā dil kā
dard uTh uTh ke batātā hai Thikānā dil kā

bīmār jab haiñ karte haiñ fariyād chārāgar
kyā dāstān-e-dard sukūt-e-mahan meñ thī

lab par ḳhudā kā naam ho dil meñ vatan kā dard
nikle badan se ruuh mirī is adā ke saath

jo tū ne diyā us meñ izāfa hī huā hai
is dard kī daulat meñ ḳhayānat nahīñ kī hai

aisā bhī nahīñ dard ne vahshat nahīñ kī hai
is ġham kī kabhī ham ne ishā.at nahīñ kī hai

zindagī tū ne hameñ dard ke aañsū baḳhshe
phir bhī tere hī taraf-dār hue haiñ ham log

ye to achchhā hai ki dukh-dard sunāne lag jaao
har kisī ko na magar zaḳhm dikhāne lag jaao

ik tirī sadā ne kyā chhuā
dard be-qatār ho ga.e

aadmī aur dard se nā-āshnā mumkin nahīñ
aks se ḳhālī ho koī ā.īna mumkin nahīñ

kisī ahl-e-dard se pochhiye zarā is chaman kā mo.āmla
vo chaman ki fasl-e-bahār meñ bhī jahāñ pe phuul khile na the

tafāvut kuchh nahīñ gulchīñ meñ aur be-dard ḳhūbāñ meñ
jo us ke haath gul TuuTe to in ke haath dil TuuTe

hai dil meñ 'riyāz' apne chhupī dard-kahānī
ro-dho ke zamāne ko sunā kyuuñ nahīñ lete

ahl-e-ġham ke saath un kā dard-o-ġham sahtī huuñ maiñ
kāñpte hoñToñ pe ban kar bad-duā rahtī huuñ maiñ

zaḳhm kab kā thā dard uThā hai ab
us ke jaane kā dukh huā hai ab

ḳhudā hī jaane ki kyā dil pe choT lagtī hai
tumhāre paas jo aayā vo dard-mand huā

firāq meñ to satātī hai ārzū-e-visāl
shab-e-visāl meñ kyuuñ dard-e-dil do-chand huā

rah gayā dil meñ ik dard sā
dil meñ ik dard sā rah gayā

haañ mirī fikr alag hai to sabab hai is kā
dard ke chūlhe pe sau baar ubālī huī hai

maiñ huuñ aur tanhā.iyoñ kā dasht hai
dard ko mere nahīñ jaanā koī

raat hairān huuñ kuchh chup hī mujhe lag ga.ī 'mīr'
dard pinhāñ the bahut par lab-e-iz.hār na thā