Tags-Dard

jaise jaise raat Dhalī hai dard kī lazzat aur baḌhī
yādoñ kī ḳhushbū meñ basā kar ham ne ḳhuub sañvārī raat

shaam se kaliyāñ dard kī mahkīñ jalte rahe ashkoñ ke charāġh
jaise sabā gulzār se guzre ham ne aise guzārī raat

ġham-e-habīb nahīñ kuchh ġham-e-jahāñ se alag
ye ahl-e-dard ne kyā mas.ale uThā.e haiñ

tujhe dard kyuuñ ki sunā.ūñ maiñ na ḳhudā kisī ko dikhā.e ye
jo kuchh apne jī pe guzartī hai kahūñ kyā ki us kā bayāñ nahīñ

dard ash.ār meñ utar aayā
log kahne lage kamāl huā

tire ahl-e-dard ke roz-o-shab isī kashmakash meñ guzar ga.e
kabhī ġham meñ Duub ke rah ga.e kabhī Dūbte hī ubhar ga.e

duur ho jaa.eñ dukh zamāne ke
sāhab-e-dard ho agar insāñ

bhīgī miTTī kī mahak pyaas baḌhā detī hai
dard barsāt kī būñdoñ meñ basā kartā hai

ab rah-rav-e-māñda se kuchh na kaho haañ shaad raho ābād raho
baḌī der se yaad kiyā tum ne baḌī dard se dī hai sadā tum ne

ġham-e-ishq meñ kaarī davā na duā ye hai rog kaThin ye hai dard burā
ham karte jo apne se ho saktā kabhī ham se bhī kuchh na kahā tum ne

basar ho yuuñ ki har ik dard hādisa na lage
guzar bhī jaa.e koī ġham to vāqi.a na lage

maiñ jaise dard kā mausam
ghaTā ban kar jo bas jaatā hai āñkhoñ meñ

sīna-e-sañg se dariyā nahīñ bahte dekhe
kaun kahtā hai ki haiñ dard se aarī patthar

ham ne to justujū ko bhī hai mudda.ā kiyā
ya.anī ki dil ke dard ko husn-e-navā kiyā

shām-e-taklīf kī duniyā meñ sahar ho to sahī
haa.e kam-baḳht kahīñ dard-e-jigar ho to sahī

dard kā kyā hai mire chhed mujhe pyāre haiñ
maiñ tamannāoñ ke kāñToñ meñ piroyā huā huuñ

batāo mujh ko ye kyā huā hai ye kaun sā dard-e-lā-davā hai
ye kyuuñ mirā dam ulajh rahā hai hai ḳhud-baḳhud jī niDhāl kaisā

nahīñ hai ab tāb-e-dard-e-furqat kahāñ kī izzat kahāñ kī ġhairat
haiñ mubtalā apne haal meñ ham kisī kā is dam ḳhayāl kaisā

batā.eñ aap ko kyā hai 'matīn' kī pahchān
sarāpā dard hai tasvīr-e-yās lagtā hai

ye marhala-e-qat-e-ta.alluq to kaThin thā
ik dard kā dariyā bhī hai ab dīda-e-tar meñ