Tags-Dard

mujhe shak guzar rahā hai tirī chāra-sāziyoñ par
ai masīh-e-vaqt batlā ye diloñ meñ dard kyuuñ haiñ

tire chāñd jaise ruḳh par ye nishān-e-dard kyuuñ haiñ
tire surḳh ārizoñ ke ye gulāb zard kyuuñ haiñ

maand paḌte jā rahe the ḳhvāb-tasvīroñ ke rañg
raat utartī jā rahī thī dard kī dīvār se

āñkhoñ se merī us ke dupaTTe tak aayā hai
ai rabb-e-dard ashk kī hijrat qubūl kar

ik dard kī āñdhī mujhe rakhtī hai hirāsāñ
ik aas kā jhoñkā bhī uḌātā hai ajab shor

ġhubār-e-fikr ko tahrīr kartā rahtā huuñ
maiñ apnā dard hama-gīr kartā rahtā huuñ

dard kā dard se rishta hai chalo ai 'majrūh'
aaj yāroñ se ye ik uqda-e-āsāñ to khulā

vo ab ke aa.e to sach un ke saath thā lekin
ajiib tarah kā be-dard sach thā

ik anokhe dard ke paḌ rahe haiñ bhañvar yahāñ
abhī bahr-e-ġham meñ tamavvujāt ajiib haiñ

ye dard hai hamdam usī zālim kī nishānī
de mujh ko davā aisī ki ārām na aa.e

jab dard kī lahreñ Duub ga.iiñ
jab āñkheñ chehra bhuul ga.iiñ

bhar ga.e zaḳhm to kyā dard to ab bhī koī hai
aañkh rotī hai to rone kā sabab bhī koī hai

kaTte hī kaTegī hijr kī shab liye dard chalo tā-sub.h-e-tarab
in shauq kī maarī āñkhoñ se kuchh va.ada-o-paimāñ aur sahī

jo tūfān aayā thā us ke ab koī āsār nahīñ
qulzum-e-dard meñ dil kā safīna kab kā Duub gayā sā.īñ

khiḌkī kholo kuchh to yahāñ bhī taaza narm havā aa.e
manzar sahn-e-chaman kā ubhre bū-e-dard-rubā aa.e

tamām chāragaroñ se to mil chukā hai javāb
tumheñ bhī dard-e-mohabbat sunā.e dete haiñ

zindagī kyā kisī muflis kī qabā hai jis meñ
har ghaḌī dard ke paivand lage jaate haiñ

kyuuñ nahīñ letā hamārī tū ḳhabar ai be-ḳhabar
kyā tire āshiq hue the dard-o-ġham khāne ko ham

sadā-e-dard kī ḳhātir tumheñ 'kausar' ne chheḌā hai
shikasta-sāz ke bedār taaro tum na so jaanā